ޕެރިސް (ސެޕްޓެމްބަރު 30) - މި ސީޒަން ނިމުމުން ލިއޮނަލް މެސީ ބާސެލޯނާ އަށް ގެންނަން އެ ކްލަބުން މަސައްކަތް ފަށާފައިވަނިކޮށް، ޕީއެސްޖީން މެސީ އަށް އާ ކޮންޓްރެކްޓެއް ހުށަހަޅައިފި އެވެ.
ބާސެލޯނާގެ މާލީ ހާލަތު ގޯސްވެގެން، މިދިޔަ އަހަރު އެ ޓީމަށް ޖެހުނީ މެސީ ދޫކޮށްލާށެެެވެ. މެސީ ލައްވައި އާ ކޮންޓްރެކްޓެއްގައި ސޮއިކުރަން ބާސެލޯނާ އިން ބެލިއިރު، އެންމެ ބޮޑު މައްސަލަ އަކަށް އޭރު ދިމާވީ ބާސެލޯނާގެ ހުރިހާ ކުުޅުންތެރިިންގެ ޖުމްލަ މުސާރަ އިންތިހާ އަށް ބޮޑުވެފައިވުމެވެ.
ފަސް އަހަރުގެ ކޮންޓްރެކްޓެއްގައި ބާސެލޯނާއާ އެކު ސޮއިކުރަން މެސީ ނިންމި ނަމަވެސް ފަހު ވަގުތު އެކަން ކުރެވެން ނެތުމުން، ބާސެލޯނާ ދޫކޮށް މެސީ ގުޅުނީ ދެ އަހަރުގެ ކޮންޓްރެކްޓެއްގައި ފްރާންސްގެ ޕީއެސްޖީއާ އެވެ.
މި ސީޒަނަށް ފަހު، މެސީ، 35، ޕީއެސްޖީއާ އެކު ހަދާފައިވާ ކޮންޓްރެކްޓް ހަމަވާނެ އެވެ. ރިޕޯޓްތައް ބުނާގޮތުން ބާސެލޯނާ އިން އަންނަނީ އަންނަ ސީޒަނަށް ހިލޭ ޓްރާންސްފާއެއްގައި މެސީގެ ސޮއި ހޯދަން މަސައްކަތް ކުރަމުންނެވެ. އެކަމަށް ބާރު ލިބުނީ ދާދިފަހުން ބާސެލޯނާގެ ނައިބު ރައީސް އެޑޮއާޑް ރޮމޭއު ދެއްކެވި ވާހަކަތަކަކުންނެވެ.
ރޮމޭއު ވިދާޅުވީ މެސީ އަލުން ބާސެލޯނާ އަށް އަންނަން މާލީ ގޮތުން ދަތިކަމެއް ނެތް ކަމަށެވެ.
ބާސެލޯނާ އިން މެސީ ގެންނަން މަސައްކަތް ފަށާފައިވާއިރު، ފްރާންސްގެ މީިޑިއާ ރިޕޯޓްތައް ބުނާގޮތުން މިހާރު ޕީއެސްޖީން ވަނީ މެސީ އަށް އާ ކޮންޓްރެކްޓެއް ހުށަހަޅައިފަ އެވެ. އެއީ މިހާރު ވެސް އޭނާ އަށް ލިބެމުން އަންނަ މުސާރަ އަށް އިތުރު އެއް އަހަރުގެ ކޮންޓްރެކްޓެކެވެ. އެއީ މުސާރައިގެ ގޮތުގައި 30 މިލިއަން ޑޮލަރާއި އިތުރު ބޯނަސްތަކެވެ.
މިދިޔަ ސީޒަނުގައި ޕީއެސްޖީގައި މެސީ އަށް އެންމެ ރަނގަޅު ކުޅުން ދައްކަން އުނދަގޫވި އެވެ. އެކަމަކު، މެސީ މި ފަހަރު އަންނަނީ ރަނގަޅު ފޯމެއް ދަމަހައްޓަމުންނެވެ. މެސީ ވަނީ މި ސީޒަނުގައި މިހާތަނަށް 11 މެޗުން ހަ ގޯލު ޖަހައި، އަށް ގޯލު ޖަހަން ފުރުސަތު ތަަނަވަސްކޮށްދީފަ އެވެ.
