ރަޝިއާގެ އިރުމަތީގައި އޮންނަ ވްލަޑިވޮސްޓޮކް ސިޓީގައި ޖަޕާނުގެ ޑިޕްލޮމެޓަކު ކަނު ބަނދެ ހައްޔަރު ކުރި ކަމަށް ޖަޕާނުން ތުހުމަތުކޮށްފި އެވެ.
މޮޓޮކީ ޓަޓްސުނޮރީއަކީ އެ ސިޓީގައި ހުންނަ ޖަޕާނުގެ ކޮންސުލް އެވެ. އަންގާރަ ދުވަހު އޭނާ ފުލުހުންގެ ބަންދުން ދޫކޮށްލައި 48 ގަޑިއިރުގެ ތެރޭގައި ރަޝިއާއިން ފޭބުމަށް އެންގި އެވެ. އޭނާއަށް ތުހުމަތު ކުރަނީ ޖާސޫސް ކުރި ކަމަށެވެ.
ރަޝިއާއިން ބުނާ ގޮތުގައި ޓަޓްސުނޮރީ ވަނީ ރަޝިއާ އާއި އޭޝިއާގެ އެހެން ގައުމަކާ ދެމެދު އޮތް ގުޅުމާ ބެހޭ ސިއްރު މައުލޫމާތުތަކެއް ހޯދާފަ އެވެ. އޭނާ ހައްޔަރު ކުރީ "ރެޑް ހޭންޑުކޮށް" ކަމަަށް ރަޝިއާގެ ޖާސޫސީ އިދާރާއިން ބުނެ އެވެ.
ޖަޕާނުން އެ ތުހުމަތު ދޮގުކުރެ އެވެ. ޖަޕާނުން ބުނެފައި ވަނީ ރަޝިއާއިން މައާފަށް އެދެން ޖެހޭނެ ކަމަށާއި ޓަޓްސުނޮރީ ހައްޔަރު ކުރީ މުއާހަދާތަކާ ހިލާފަށް ކަަމަަށެވެ.
"އެ އޮފިޝަލުގެ ކަނު ބަނދެ، ދެ އަތާއި ބޮލަށް ޕްރެޝަރުކޮށް، ހަައްޔަރު ކުރި ވަގުތު ހަށިގަނޑު ގުޑާނުލެވޭ ވަރު ކުރި. އޭގެ ފަހުން ބިރު ދައްކާ ފަދަ ގޮތަކަށް ސުވާލުކުރި،" ޖަޕާނުގެ ޗީފް ކެބިނެޓް ސެކެޓްރީ ހިރޮކަޒޫ މަޓްސުނޯ ނޫސްވެރިންނަށް ވިދާޅުވި އެވެ.
ޖަޕާނުން ބުނީ އެއީ ބަލައިގަނެވޭނެ ފަދަ އަމަލުތަކެއް ނޫން ކަމަަށާއި ބުދަ ދުވަހުގެ ކުރިން އެ އޮފިޝަލް ރަޝިއާ ދޫކޮށް ދާނެ ކަމަށެވެ.
ޔޫކްރެއިން ހަނގުރާމައާ ދެކޮޅަށް އަޑު އުފުލާފައިވާ ޖަޕާނަކީ ހުޅަނގުގެ ގައުމުތަކާ އެއް ގޮތަަށް "އަދުއްވެއްގެ" ގޮތުގައި ރަަޝިއާއިން ކަނޑައަޅާފައިވެ އެވެ.
އޭގެ އިތުރުން ރަށްތަކެއްގެ މައްސަލައިގައި ވެސް ރަޝިއާ އާއި ޖަޕާނާ ދެމެދު ދެބަސްވުން އޮވެ އެވެ. އެއީ ދެ ވަނަ ބޮޑު ހަނގުރާމައަށް ފަހު އުފެދުނު ދެބަސްވުމެކެވެ.
