އުތުރު ކޮރެއާގެ އިރުމަތީ އައްސޭރިފަށުން ބެލިސްޓިކް މިސައިލެއް ޓެސްޓުކޮށްފައިވާ ކަމަށް ދެކުނު ކޮރެއާގެ އަސްކަރީ އޮފިޝަލުން ބުނެފި އެވެ.
އުތުރު ކޮރެއާއިން އެންމެ ފަަހުން މިސައިލެއް ޓެސްޓު ކުރީ މިދިޔަ ޖޫން މަހު އެވެ. އާދީއްތަަ ދުވަހު އަނެއްކާވެސް މިސައިލެއް ޓެސްޓު ކުރި އިރު، މި ވަގުތު އެމެރިކާގެ އެއާކްރާފްޓް ކެރިއަރެއް އޮތީ ދެކުނު ކޮރެއާގަ އެވެ.
އެއީ އެމެރިކާ އާއި ދެކުނު ކޮރެއާ ގުޅިގެން ބާއްވާ އަސްކަރީ ތަމްރީނަކަށް ދަތުރު ކުރި އުޅަނދެކެވެ. އޭގެ ފަހުން އެމެރިކާގެ ނައިބު ރައީސް ކަމަލާ ހެރިސް ދެކުނު ކޮރެއާއަށް ދަތުރު ކުރެއްވުމަށް ހަމަޖެހިފައިވެ އެވެ.
ދެކުނު ކޮރެއާގެ ސަރުކާރުން ވަނީ މިސަައިލް ޓެސްޓު ކުރުން ކުށްވެރިކޮށްފަ އެވެ. އދ. އިން އޮންނަނީ އުތުރު ކޮރެއާއިން ބެލިސްޓިކް އަދި ނިޔުކްލިއާ ހަތިޔާރު ޓެސްޓް ކުރުން މަނާކޮށްފަ އެވެ.
ދެކުނު ކޮރެއާގެ ސިފައިން ބުނީ ކުރު ރާސްތާގެ މިސައިލް ފޮނުވީ އާދީއްތަ ދުވަހުގެ ހެނދުނު 07:00 ހާއިރު ޓައެޗޯން ކައިރިން ކަމަށެވެ. އެއީ އުތުރު ކޮރެއާގެ ވެރިރަށް ޕިޔޯންގްޔޭންގާ 100 ކިލޯމީޓަރު އުތުރެވެ. މިސައިލް ދަތުރު ކުރީ 60 ކިލޯމީޓަރުގެ އެލްޓިޓިއުޑްގައި 600 ކިލޯމީޓަރުގެ ސަރަހައްދަކަށެވެ.
ޖަޕާނުގެ ކޯސްޓުގާޑުން ވެސް ބުނީ އުތުރު ކޮރެއާއިން މިސައިލެއް ޓެސްޓުކޮށްފައިވާ ކަމަށާއި މަނަވަރުތައް ސަމާލުވުމަށް އަންގާ ކަމަށެވެ.
ފާއިތުވި އަހަރުގެ ތެރޭގައި ވެސް އުތުރު ކޮރެއާއިން މިސައިލްތަކެއް ޓެސްޓު ކުރުމުން އެ ސަރަހްދުގެ ގައުމުތަކުން ކަންބޮޑުވުން ފާޅުކުރި އެވެ.
މި މަހުގެ ކުރީކޮޅު އުތުރު ކޮރެއާާއިން ވަަނީ އެ ގައުމުގައި ނިޔުކްލިއާ ހަތިޔާރު ހުރި ކަމަށް ކަނޑައަޅައި ގާނޫނެއް ފާސްކޮށްފަ އެވެ. ދަތިކުރުމުގެ ފިޔަވަޅު އަޅާފައިވި ނަމަވެސް 2006 އާއި 2017 އާ ދެމެދު އެ ގައުމުން ހަަ ނިޔުކްލިއާ ޓެސްޓު ކުރި އެވެ.
