ސްރީލަންކާގެ ޕޯލްޓްރީ ދަނޑުތަކުގައި ގެންގުޅޭ ދޫނީގެ އަދަދު ވަރަށް ބޮޑަށް ދަށްވެފައި ވާތީ ބިހުގެ ދަތިކަން ކުރިމަތިވެދާނެ ކަމަށް އޯލް އައިލެންޑް ޕޯލްޓްރީ އެސޯސިއޭޝަން (އައިޕާ) އިން ބުނެފި އެވެ.
އެ ޖަަމިއްޔާގެ ރައީސް އަޖިތު ގުނަސޭކަރަ ވިދާޅުވީ ޕޯލްޓްރީ އިންޑަސްޓްރީ ދޫކޮށް ގިނަ ބަޔަކު ދާން ފަށާފައިވާ ކަމަަށާއި އެއީ ދޫނިތަކަށް ކާންދޭން ބޭނުންވާ ތަކެތީގެ އަގު އުފުލުމުން ކަމަށެވެ.
ތަކެތީގެ އަގު އުފުލުމުން، ބިސް ވިއްކައިގެން ލިބޭ އާމްދަނީއިން ދެކޮޅު ނުޖެހެ އެވެ. އެހެންވެ، ގިނަ ބަޔަކު ވަނީ ދޫނިތައް ވިއްކާލާފައި ކަމަށް ގުނަސޭކަރަ ވިދާޅުވި އެވެ.
"ބްރީޑް ކުރަން ނުވަތަ ޕޯލްޓްރީގެ ގޮތުގައި ވިއްސައިގެން ގެންގުޅެން އާއްމުކޮށް ކުކުޅާއި އެހެން ދޫނި އިމްޕޯޓް ކުރަނީ. އެކަމަކު މި އަހަރު އިމްޕޯޓް ކުރުން ވެސް މަނާކުރީ،" އޭނާ ވިދާޅުވި އެވެ.
އެގޮތުން ކޮންމެ އަހަރަކު ސަރުކާރުން 80،000 ދޫނި އިމްޕޯޓްކޮށް، އެ ދޫނިތައް ވިއްސައިގެން ޕޯލްޓްރީ އިންޑަސްޓްރީ ކުރިއެރުވި އެވެ. އެކަމަކު މި އަހަރު އިމްޕޯޓް ކުރީ އެންމެ 9000 ދޫންޏެވެ.
ގުނަސޭކަރަ ވިދާޅުވީ މިހާރު ވެސް ކުކުޅުގެ ދަތިކަން ބޮޑު ކަމަށާއި ވަރަށް އަވަހަށް ބިހުގެ ދަތިކަން މުޅި ގައުމަށް ކުރިމަތިވާނެ ކަމަށެވެ.
