އޭޑީކޭން ދެމުން އަންނަ ހިދުމަތްތަކުގެ ސަބަބުން ސަރުކާރުގެ ސިޔާސަތުތައް ތަންފީޒު ކުރުމުގައި އެހީތެރިކަން ލިބޭ ކަމަށް ނައިބު ރައީސް ފައިސަލް ނަސީމު ވިދާޅުވެއްޖެ އެވެ.
އޭޑީކޭ ހޮސްޕިޓަލުން އިންތިޒާމްކޮށްގެން ބާއްވަމުން އަންނަ "މޯލްޑިވްސް ބްރައިން އެންޑް ސްޕައިން ކޮންފަރެންސް 2022" ފެށުމުގެ ރަސްމިއްޔާތުގައި ވާހަކަ ދައްކަވަމުން ނައިބް ރައީސް ވިދާޅުވީ އިންސާނީ ވަސީލަތްތައް ތަރައްގީކުރުމުގައި ޕްރައިވެޓް ސެކްޓާއިން އަދާކުރާ ދައުރު މުހިއްމު ކަމަށެވެ.
އެގޮތުން, ރާއްޖޭގެ ސިއްހީ ދާއިރާ ކުރިއެރުވުމަށް އޭޑީކޭ ހޮސްޕިޓަލުން ކުރަމުންދާ މަސައްކަތްތަކަށް ތައުރީފު ކުރައްވައި، ޑޮކްޓަރުންނަށް ސްކޮލަޝިޕްތައް ދިނުމާއި، މުވައްޒަފުން ތަމްރީން ކުރުމަށް އެ ހޮސްޕިޓަލުން ކުރާ މަސައްކަތްތައް ނައިބް ރައީސް ފާހަގަކުރެއްވި އެވެ.
އޭޑީކޭ ހޮސްޕިޓަލުން އަލަށް ފެށުމަށް ތައްޔާރުވަމުން އަންނަ ހިދުމަތްތަކުގެ މައްޗަށް ވެސް ނައިބް ރައީސް އަލިއަޅުއްވާލެއްވި އެވެ. އަދި ރާއްޖޭގެ ސިއްހީ ދާއިރާ ތަރައްގީކުރުމުގައި އޭޑީކޭ ހޮސްޕިޓަލުން ބައިވެރިވެ، ކުރަމުންދާ މަސައްކަތްތަކަށް އެ ހޮސްޕިޓަލްގެ މެނޭޖްމަންޓާއި ސްޓާފުންނަށް ޝުކުރު އަދާކުރެއްވި އެވެ.
"ސަރުކާރުގެ އެއް ސިޔާސަތު އެއީ ބޭރަށް ނުގޮސް މާލޭން ނުވަތަ ރާއްޖޭން އެ ހިދުމަތް ފޯރުކޮށްދިނުން. އޭޑީކޭން ތާރަފްކުރާ އާ ހިދުމަތްތަކާ އެކު މުޅި ގައުމުގެ ސިއްހީ ހިދުމަތަށް އޭގެ ފައިދާ ކުރޭ،" ނައިބް ރައީސް ވިދާޅުވި އެވެ.
މީގެ އިތުރުން ނައިބް ރައީސް ވަނީ މަތީ ތައުލީމް ހާސިލްކުރުމަށް ސަރުކާރުން ދެމުން އަންނަ ސްކޮލަޝިޕްތަކުގައި މިހާރު ވެސް މެޑިސިންގެ ދާއިރާއިން 70 އަށްވުރެ ގިނަ ދަރިވަރުން ކިޔަވަމުންދާ ކަމަށެވެ.
ސަރުކާރުން ކުރިޔަށް ގެންދާ ހިލޭ ޑިގްރީ ޕްރޮގްރާމްގައި މިހާތަނަށް 15000 ވުރެ ގިނަ ދަރިވަރުން ބައިވެރިވެފައި ވާއިރު، އޭގެ ތެރޭގައި ނަރުސްކަން ކިޔަވަމުންދާ 800 ވުރެ ގިނަ ދަރިވަރުން ހިމެނޭކަން ވެސް ނައިބު ރައީސް ފާހަގަކުރެއްވި އެވެ.
އޭޑީކޭ ހޮސްޕިޓަލުން އިންތިޒާމްކޮށްގެން ބާއްވާ ބްރައިން އެންޑް ސްޕައިން ކޮންފަރެންސް ކުރިޔަށްދަނީ މާދަމާގެ ނިޔަލަށް، ކްރޮސްރޯޑްސް މޯލްޑިވުސްގަ އެވެ. މިއީ 2017 ވަނަ އަހަރު ފެށި މިސިލްސިލާގެ ހަތަރު ވަނަ ކޮންފަރެންސެވެ.
