މި ހަފުތާ ބަންދުގައި ރާއްޖޭގައި ފަށާ ދެކުނު އޭޝިއާ ގައުމުތަކުގެ އެންމެ ބޮޑު އަންހެން ބާސްކެޓްބޯޅަ މުބާރާތް، ސާބާ ވިމެންސް ޗެމްޕިއަންޝިޕްގައި ވާދަކުރާ ގައުމީ އަންހެން ބާސްކެޓް ޓީމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ހިތްވަރު ދެއްވައިފި އެވެ.
މި މަހު 24-30 އަށް ޒުވާނުންގެ މަރުކަޒު އެތެރޭ ކޯޓުގައި ކުރިއަށްދާ ސާބާ ވިމެންސް ޗެމްޕިއަންޝިޕަށް ގައުމީ އަންހެން ޓީމުން މިހާރު ކުރިއަށްގެންދަނީ އެންމެ ފަހުގެ ތައްޔާރީތަކެވެ.
ނައިބު ރައީސް ފައިސަލް އާއި ކުޅިވަރާ ބެހޭ ވަޒީރު، އަހުމަދު މަހުލޫފް ވަނީ ބާސްކެޓްބޯޅަ އަންހެން ޓީމާ ބައްދަލު ކުރެއްވީ އިއްޔެ އެވެ.
ކުޅުންތެރިންނާ މުހާތަބުކުރައްވައި ނައިބު ރައީސް ވަނީ ކުޅިވަރު ކުރިއެރުވުމަށް ސަރުކާރުން ކުރަމުން އަންނަ މަސައްކަތްތައް ހިއްސާކުރައްވައިފަ އެވެ. އަދި ދިވެހި ކުޅުންތެރިންގެ ފެންވަރު ރަނގަޅު ކުރުމަށް އަމާޒުކޮށްގެން ތަމްރީނުގެ އިތުރު ފުރުސަތުތައް ކުޅުންތެރިންނަށް ފަހިކޮށް ދެއްވާނެކަމުގެ ޔަގީންކަން ނައިބު ރައީސް ދެއްވި އެވެ.
"ތި ކުޅުންތެރިންގެ ފަރާތުން އެދެނީ މި މުބާރާތުން ކާމިޔާބީ އަށް، އެއީ ގައުމުގެ އެންމެންނަށް ލިބޭނެ ހިތްހަމަޖެހުން،" ނައިބު ރައީސް ވިދާޅުވި އެވެ.
ސާބާ ވިމެންސް ޗެމްޕިއަންޝިޕްގައި ވާދަކުރާ ރާއްޖޭގެ ގައުމީ އަންހެން ޓީމުގެ ޖޯޒީ ނައިބު ރައީސް ފައިސަލް (މ) އަށް ހަދިޔާކުރަނީ: ނައިބު ރައީސްއާ އެކު ގައުމީ އަންހެން ބާސްކެޓް ޓީމުގެ އިސްރާއު (ވ) އަދި ބާސްކެޓްބޯލް އެސޯސިއޭޝަންގެ ރައީސް އެޑަމް.-- ފޮޓޯ: ރައީސް އޮފީސް
މި މުބާރާތުގައި ރާއްޖެ އަށް ރީތި ނަން ހޯދައިދިނުމަށް މަސައްކަތް ކުރުމަށް އެންމެހާ ކުޅުންތެރިންގެ ކިބައިން ރައީސުލްޖުމްހޫރިއްޔާގެ ނައިބު އެދިވަޑައިގެންނެވިއެވެ.
މި ބައްދަލުވުމުގައި ގައުމީ އަންހެން ބާސްކެޓް ޓީމުން ވަނީ ސާބާ ވިމެންސް ޗެމްޕިއަންޝިޕްގައި ބޭނުންކުރާ ގައުމީ ޓީމުގެ ޖޯޒީ ނައިބު ރައީސް އަށް ހަދިޔާކުރައްވައިފަ އެވެ.
އަންނަ ހޮނިހިރު ދުވަހު ފަށާ މުބާރާތުގައި ރާއްޖޭގެ އިތުރުން ވާދަކުރަނީ އިންޑިއާ، ސްރީ ލަންކާ، ނޭޕާލް، ބޫޓާން އަދި ބަންގްލަދޭޝް އެވެ. މިއީ 2016 ވަނަ އަހަރުގެ ފަހުން ސާބާ ވިމެންސް ޗެމްޕިއަންޝިޕެއް ބާއްވާ ފުރަތަމަ ފަހަރެވެ. ރާއްޖޭން ވަނީ އެ މުބާރާތުން ލޯ މެޑަލް ހޯދައިފަ އެވެ.
މީގެ ތިން އަހަރު ކުރިން، ބާސްކެޓް އަންހެން ޓީމުން ވަނީ ސްރީ ލަންކާގެ ކޯޗު ސުޕުން ވިމާލްގެ އިރުޝާދުގެ ދަށުން 2019 ވަނަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްގެ އަންހެން ބާސްކެޓްބޯޅަ އިވެންޓުން ވެސް ލޯ މެޑަލް ހޯދައިފަ އެވެ. މި ފަހަރުގެ ސާބާ ވިމެންސް ޗެމްޕިއަންޝިޕްގައި ވެސް ގައުމީ އަންހެން ބާސްކެޓް ޓީމުގެ ކޯޗަކީ ސުޕުން އެވެ.
ސާބާ ވިމެންސް ޗެމްޕިއަންޝިޕަށް ތައްޔާރުވާން ގައުމީ އަންހެން ބާސްކެޓް ޓީމުން ވަނީ އިންޑިއާ އާއި ތައިލެންޑްގައި ޓްރެއިނިން ކޭމްޕް ފުރިހަމަކޮށްފަ އެވެ.
