ރަޝިއާގެ ރައީސް ލެޑިމިއަ ޕުޓިން ހުންނެވީ ޔޫކްރެއިން ހަނގުރާމަ ނިމުމަކަށް ގެންނަން ތައްޔާރަށް ކަމަށާއި ވަރަށް އަވަހަށް މުހިއްމު ފިޔަަވަޅެއް އަޅުއްވާނެ ކަމަށް ތުރުކީގެ ރައީސް ތައްޔިބް އުރުދުގާން ވިދާޅުވެއްޖެ އެވެ.
އުރުދުގާން ވިދާޅުވީ ދާދި ފަހުން ޕުޓިންއާ ބައްދަލުކުރައްވައި ދެކެވުނު ވާހަކަތަކުން ހާމަވީ ވީ އެންމެ އަވަހަަށް ހަނގުރާމަ ނިންމަން ޕުޓިން ބޭނުންވެވަޑައިގަންނަވާކަން ކަމަށެވެ.
"ޕުޓިން އަޅުގަނޑަށް ދެއްކެވި މަންޒަރަކީ ވީ އެންމެ އަވަހަކަށް މިކަން ނިންމަން ބޭނުންވެވަޑައިގަންނަވާކަން،" އެމެރިކާގެ ޕީބީއެސް ޗެނަލްއަށް އުރުދުގާން ވިދާޅުވި އެވެ.
އޭގެ އިތުރުން ޔޫކްރެއިނާއި ރަޝިއާއާ ދެމެދު ވަރަށް އަވަހަށް 200 ގައިދީން ބަދަލު ކުރާނެ ކަމަށް އުރުދުގާން ވިދާޅުވި އެވެ. ނަމަވެސް އޭގެ ތަފްސީލެއް ނުދެއްވަ އެވެ.
ޔޫކްރެއިން ހަނގުރާމައިގައި ސުލްހަ ގެންނަން މެދުވެރިއެއްގެ ދައުރު އަދާކުރައްވަނީ އުރުދުގާން އެވެ. ނޭޓޯގެ މެމްބަރެއްގެ ގޮތުގައި ހިމެނޭ ތުރުކީއިން ގެންގުޅެނީ ހަނގުރާމައާ މެދު "ހަމަހަމަ" ސިޔާސަތެކެވެ.
ޔޫކްރެއިންގައި ތާށިވެފައި ހުރި ގޮދަން ޝިޕްމަންޓް އެކްސްޕޯޓް ކުރަަން ބާރު އެޅުމަށް އދ. އިން ކުރި މަސައްކަތުގައި ވެސް އެންމެ އިސް ދައުރެއް އަދާކުރެއްވީ އުރުދުގާން އެވެ.
އޭގެ އިތުރުން މިދިޔަ ހަފުތާގައި އެމަނިކުފާނު ވިދާޅުވީ ހަމަލާތައް ވަގުތީ ގޮތުން މެދުކަނޑާލުމާ ގުޅޭ ސީދާ މަޝްވަރާ ބޭއްވުމަށް މަސައްކަތް ކުރަމުންދާ ކަމަށެވެ.
ނަމަަވެސް ޔޫކްރެއިނުން ބުނެފައި ވަނީ އެއްވެސް މަޝްވަރާއެއް ކުރެވޭނީ އެ ގައުމުގެ ފަސްގަނޑުން ރަޝިއާގެ ސިފައން ފޭބުމުން ކަމަށެވެ.
