ޔޫކްރެއިން ހަނގުރާމައިގެ ތެރެއިން ރަޝިއާ ސިފައިން ހައްޔަރު ކުރި ސްރީލަންކާ ރައްޔިތުންތަކެއް ސަލާމަތްވެއްޖެ އެވެ.
މިދިޔަ މޭ މަހު ހައްޔަރު ކުރި އެ ހަތް މީހުން ސަލާމަތްވީ އިޒިޔަމް ސިޓީއިން ރަޝިއާ ސިފައިން ފައިބާ، އެ ތަނުގެ ކޮންޓްރޯލް އަލުން ޔޫކްރެއިނަށް ލިބުމުންނެވެ.
ސަލާމަތްވުމާ އެކު އެ މީހުން ވަނީ ރަޝިއާ ސިފައިންގެ އަތް ދަށުގައި ތިބި އިރު ކުރިމަތިވި އަނިޔާގެ ވާހަކަތައް އާއްމުކޮށް ދައްކާފަ އެވެ.
އެ ހަތް މީހުން ކުރިން ދިރިއުޅުނީ އިރުއުތުރު ޔޫކްރެއިންގެ ކުޕިއާންސްކްގަ އެވެ. ހަނގުރާމައިގެ ނުރައްކާ ބޮޑުވުމުން އެ ތަަން ދޫކޮށް ފައިމަގުގައި ހާރްކީވްއަށް ދާން އެ މީހުން މަސައްކަތް ކުރި އެވެ.
އެހެން ނަމަވެސް، އެންމެ ފުރަތަމަ ޖެހުނު ޗެކްޕޮއިންޓުން ރަޝިއާ ސިފައިން އެ މީހުން ހައްޔަރު ކުރި އެވެ. ކަނު ބަނދެ، އަތް ބަނދެ، އެ މީހުން ގެންދިޔައީ ރަޝިއާ ބޯޑަރު ކައިރީގައި އޮންނަަ ވޮވްޗާންސްކް އަވަށުގެ ފެކްޓްރީއަކަށެވެ.
އޭގެ ފަހުން ހަތަރު މަސް ހޭދަކުރީ ރަޝިއާ ސިފައިންގެ އަތް ދަށުގަ އެވެ. އެ މީހުން ތުހުމަތު ކުރާ ގޮތުގައި ލާއިންސާނީ އަމަލުކޮށް ގަދަކަމުން މަސައްކަތް ކުރުވުން ފަދަ ކަންކަމާ ކުރިމަތިވި އެވެ.
އެ މީހުންގެ ތެރޭގައި ހުރީ އެންމެ އަަންހެނެކެވެ. އުމުރުން 50 އަހަރުގެ މޭރީ އެޑިތް އުތާޖްކުމާރް ހުރީ އެހެން އެންމެންނާ ވަކިން އެކަހެރިކޮށް ބަހައްޓާފަ އެވެ. ހުރިހާ ފިރިހެނުން ތިބީ އެއް ތަނެއްގަ އެވެ.
ކެއުމަށް ކާބޯތަކެތީގެ ކުޑަ މިންވަރެއް ކޮންމެ ދުވަހަކު ވެސް ލިބުނު ކަމަށާއި ފާހާނާ ކުރުމަށް ލިބުނީ ކޮންމެ ދުވަހަކު ވެސް އެންމެ ފަހަރަކު ދެ މިނެޓު ކަމަށް އެ މީހުން ތުހުމަތު ކުރެ އެވެ.
އަދި ފެން ވެރުމަށް ފުރުސަތު ލިބުނީ މަދު ފަހަރަކު ކަމަށާއި އެ ފަހަރުތަކުގައި ވެސް ދެ މިނެޓު ތެރޭގައި ފެން ވަރައި ނިންމަން ޖެހޭ ކަމަށް ބުންޏެވެ.
އެ މީހުންނަށް ކުރި ޖިސްމާނީ އަނިޔާތަކުގެ ތެރޭގައި ފައިގެ ނިޔަފަތިތައް އުފުރުން ފަދަ ކަަންކަން ހިމެނެ އެވެ. އެކަމަކު ހަނގުރާމައިގަައި އާއްމުންނަށް އަމާޒު ކުރާ ކަމަށް ކުރާ ތުހުމަތު ރަޝިއާއިން ދޮގުކުރެ އެވެ.
އިޒިޔަމް ސިޓީގެ ކޮންޓްރޯލް ޔޫކްރެއިނަށް ލިބުމުން ލަންކާ ގްރޫޕް ސަލާމަތްވި އިރު، އެ ސިޓީ ކައިރީ ގިނަ އަދަދެއްގެ ބަޔަކު މަރާލައި ވަޅުގަނޑަކަަށް އެއްލާލާފައި ވަނިކޮށް ފެނިފައިވެ އެވެ.
ލަންކާ ގްރޫޕް ސަލާމަތްވުމުން އަނެއްކާވެސް ފައިމަގުގައި ހާރްކީވްއަށް ދަތުރު ފެށި ކަމަށްވެ އެވެ. އެކަކުގެ އަތުގައި ވެސް ފޯނެއް ނެތުމުން، އެ މީހުންނަށް ދިމާވި ގޮތް އެންގޭނެ ގޮތެއް އޭރު ނެތެވެ.
މަގުމަތިން ބަޔަކަށް އެ މީހުން ފެނި، ފުލުހުންނަށް ގުޅައި އެހީތެރިކަން ފޯރުކޮށްދިނެވެ. އެ މީހުންގެ އާއިލާތަކާ ގުޅޭނެ ގޮތް ވީ އޭގެ ފަހުން ފުލުހުންގެ ފޯނު ބޭނުންކޮށްގެންނެވެ.
އެ އެންމެން ވެސް މިހާރު ފުލުހުންގެ އެހީގައި ހާރްކީވްއަށް ގެންގޮސް، ސިއްހީ ފަރުވާ އާއި އެހީތެރިކަން ދަނީ ލިބެމުންނެވެ.
