ރޯމް (ސެޕްޓެމްބަރު 20) - އިދިކޮޅު ޓީމުތަކުގެ ކުޅުންތެރިންނެކޭ އެއްގޮތަށް ރޯމާ ކުޅުންތެރިން ވެސް މެޗުތަކުގައި ޕެނަލްޓީ ހޯދަން މަކަރު ހަދަންޖެހޭ ކަމަށް އެ ޓީމުގެ ކޯޗު ހޯސޭ މޮރީނިއޯ ބުނެފި އެވެ.
އިޓާލިއަން ލީގުގައި މި ހަފްތާގައި ރޯމާ ކުޅުނު މެޗުން 1-0 އިން އެޓަލަންޓާ އަތުން ބަލިވިއިރު، މި މެޗުގައި މޮރީނިއޯ އަށް ރަތް ކާޑު ދައްކައި ވަނީ ބެންޗުން ފޮނުވާލައިފަ އެވެ.
މި މެޗުގައި މޮރީނިއޯ އެންމެ ބޮޑަށް ހިތްހަމަނުޖެހުނީ އެ ޓީމުގެ ފޯވާޑް، ނިކޯލަ ޒަނިއޯލޯ އަށް ކުރި ފައުލަކަށް ޕެނަލްޓީ ނުދިނުމުންނެވެ. އެޓަލަންޓާގެ ކަލެބް އޮކޯލީ އޭރިއާތެރެއިން ފައުލުކުރި ނަމަވެސް ޒަނިއޯލޯ ނިންމީ އެޓޭކް ކުރިއަށްގެންދެވޭތޯ މަސައްކަތް ކުރުމަށެވެ. އެހެންވެ، އެ ފައުލަކަށް ނުދިނެވެ.
"އެއީ ޔަގީނުން ވެސް ޕެނަލްޓީއެއް. އަހަރެން މެޗަށް ފަހު ރެފްރީ ގާތުގައި އެހިން. ކީއްވެހޭ ޕެނަލްޓީ ނުދިނީ. ރެފްރީ އެންގީ ޒަނިއޯލޯ ނުވެއްޓޭތީ ކަމަށް،" މޮރީނިއޯ ބުންޏެވެ.
"އެހެންވީމަ، އަހަރެން އެބަޖެހޭ ކުޅުންތެރިންނަށް މި އިރުޝާދު ދޭގޮތް ބަދަލުކުރަން. އަހަރެން ދެން ބުނަން ޖެހޭނީ އަމިއްލަ ފައި މަތީގައި ކޮޅަށް ތިބޭނެ ކަމެއް ނެތޭ، ބޯޅައާ ވެސް ކުޅޭނެ ކަމެއް ނެތޭ. އަހަރެން ބުނަންވީ ސްވިމިން ޕޫލްތަކަކަށް ފުންމާ ބަޔަކު ހެން މި ލީގުގައި އުޅޭ އެހެން ކުޅުންތެރިންނެކޭ އެއްގޮތަށް އަހަރެމެން ވެސް އުޅޭށޭ. އެއީ އެ އެގޮތަށް އުޅެގެން ޕެނަލްޓީ މި ދެނީ،"
އެޓަލަންޓާ މެޗަށް ނުކުތްއިރު، ރޯމާ އަށް ދިމާވި އެންމެ ބޮޑު މައްސަލަ އަކީ މެޗު ވޯމްއަޕްގައި އެ ޓީމުގެ ތަރި، ޕައޮލޯ ޑިބާލާ އަށް އަނިޔާވުމެވެ. މޮރީނިއޯ ބުނީ ޑިބާލާ އަށް ނުކުޅެވުނު ކަމުގައި ވިޔަސް އެ މެޗުން މޮޅުވެވޭ ވަރަށް ރޯމާ އަށް ފުރުސަތު ލިބުނު ކަމަށެވެ.
އިޓާލިއަން ލީގުގެ އެއް ވަނައިގައި ނަޕޯލީ އޮތީ ދެ ވަނައިގައި އޮތް އެޓަލަންޓާއާ އެއްވަރަށް ހަތް މެޗުން 17 ޕޮއިންޓާ އެކު އެވެ. ތިން ވަނައިގައި އޮތް އުދިނޭޒީ އަށް ވަނީ 16 ޕޮއިންޓް ލިބިފަ އެވެ. ހަތަރެއްގައި އޮތް ލާޒިއޯ އާއި ފަސް ވަނައިގައި އޮތް އޭސީ މިލާނަށް ވަނީ 14 ޕޮއިންޓް ލިބިފަ އެވެ.
ހަ ވަނައިގައި ހަތް މެޗުން 13 ޕޮއިންޓާ އެކު ރޯމާ އޮތްއިރު، އިންޓަ ހަތް ވަނައިގައި އޮތީ 12 ޕޮއިންޓާ އެކު އެވެ. ޔުވެންޓަސް އަށް ވަނައިގައި އޮތީ ހަތް މެޗުން 10 ޕޮއިންޓް ހޯދައިގެންނެވެ. ނުވަ ވަނައިގައި އޮތް ޓޮރީނޯ އަށް ވެސް ވަނީ ހަތް މެޗުން 10 ޕޮއިންޓް ލިބިފަ އެވެ.
