ކިރްގިޒްތާނާއި ތަޖިކިސްތާނުގެ ބޯޑަރުގައި ހިނގި ކުރިމަތިލުންތަކުގައި 94 މީހުން މަރުވެ، 100 އަށް ވުރެ ގިނަ މީހުންނަށް އަނިޔާވެއްޖެ އެވެ.
އޭޝިއާގެ މެދުތެރޭގައި އޮންނަ ދެ ގައުމުން ހަމަލާ ބަދަލު ކުރަން ފެށީ ބުދަ ދުވަހު އެވެ. ނަމަވެސް ހުކުރު ދުވަހު ވަނީ ހަމަލާ މެދުކަނޑާލަން އެއްބަސްވެފަ އެވެ.
ކިރްގިޒްތާންގެ ރައީސް ސަދީރް ޖަޕަރޯވް ވިދާޅުވީ ހަމަލާ ދިނުން ހުއްޓާލި ނަމަވެސް އިންޒާރާއި ރުޅިވެރިކަމުގެ މެސެޖު ފޮނުވުން ހުއްޓާނުލައި ކަމަށެވެ.
ކިރްގިޒްތާނާއި ތަޖިކިސްތާނަކީ ކުރީގެ ސޯވިއެޓް ރިޕަބްލިކްގައި އޮތް ދެ ގައުމެވެ. އެ ދެ ގަައުމުގެ ދެމެދުގައި ވަރަށް ގިނައިން ހަމަލާ ބަދަލުކުރެ އެވެ.
މި ފަހަރު ހަމަލާ ދޭން ފެށުމުން އެއް ގައުމު އަނެއް ގައުމަށް ދަނީ ތުހުމަތުގެ އިނގިލި ދިއްކުރަމުންނެވެ. ދެ ގައުމުގެ މެދުގައި 1000 ކިލޯމީޓަރުގެ ބޯޑަރެއް އޮންނަ އިރު، އޭގެ ތިންބައި ކޮށްފައި އެއްބަޔާ މެދު ހިޔާލު ތަފާތުވުން އޮވެ އެވެ.
ކިރްގިޒްތާނުން ބުނީ 59 މީހުން މަރުވެ 100 އަށް ވުރެ ގިނަ މީހުންނަށް އަނިޔާވެފައިވާ ކަމަށެވެ. ތަޖިކިސްތާނުން ބުނީ 35 މީހުން މަރުވެ، 20 މީހުންނަށް އަނިޔާވި ކަމަށެވެ.
ކިރްގިޒްތާނުން ވަނީ ހަމަލާގެ ނުރައްކާ ބޮޑު ހިސާބަަކުން 137،000 މީހުން އިވެކުއޭޓްކޮށްފަ އެވެ. ތަޖިކިސްތާނުން އެފަަދަަ ފިޔަވަޅެއް އެޅި ކަމެއް ނޭނގެ އެވެ.
