ޕެރިސް (ސެޕްޓެމްބަރު 19) - ފްރެންޗް ލީގުގައި ރޭ ލިޔޯން އަތުން 1-0 އިން ޕީއެސްޖީ މޮޅުވިއިރު، އެ ޓީމުގެ ހަަމައެކަނި ގޯލު ޖެހި ލިއޮނަލް މެސީ މި ސީޒަނުގައި ހުރީ ރަނގަޅު ފޯމެއްގައި ކަމަށް ބުނެ އޭނާ އަށް ޕީއެސްޖީގެ ކޯޗު ކްރިސްޓޮފް ގަލްޓިއޭ ތައުރީފުކޮށްފި އެވެ.
މެސީގެ ގޯލުން މޮޅުވެ، ޕީއެސްޖީން ވަނީ ރޭ ލީގުގެ އެއް ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. ޕީއެސްޖީ އެއް ވަނައިގައި އޮތީ އަށް މެޗުން 22 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް ވަނީ އަށް މެޗުން 20 ޕޮއިންޓް ލިބިފަ އެވެ. މާސޭ ރޭ ކުޅުނު މެޗު ވަނީ ރެނެސްއާ 1-1 އިން އެއްވަރުވެފަ އެވެ.
ރޭގެ މެޗުގައި ޖެހި ގޯލާ އެކު މެސީ ވަނީ މި ސީޒަނުގައި މިހާތަނަށް އޭނާ ކުޅުނު 11 މެޗުން ހަ ގޯލު ޖަހައި އަށް ގޯލު ޖަހަން ފުރުސަތު ތަނަވަސްކޮށްދީފަ އެވެ.
މި ސީޒަނުގައި ޕީއެސްޖީގެ ކޯޗުކަމާ ހަވާލުވި ގަލްޓިއޭ ބުނީ މިދިޔަ އަހަރު މެސީ އަށް ދިމާވި ކަމެއް ބުނަން އޭނާ އަށް ޔަގީނުން ވެސް ނޭނގޭނެ ކަމަށެވެ. އެކަމަކު، އޭނާ ހަވާލުވި ފަހުން މެސީގެ ފަރާތުން ފެންނަނީ ކޮންފިޑެންސް ރަނގަޅު ކުޅުމެއް ކަމަށް ގަލްޓިއޭ ވަނީ ބުނެފަ އެެވެ.
"މެސީ ކަހަލަ ކުޅުންތެރިންނަކީ އެ ކުޅުންތެރިން ކުޅެންޏާ މުޅި ޓީމަށް އޭގެ އެނގުން ވާނެ. އަހަރެން ވަރަށް ހިތްހަމަ ޖެހޭ މެސީ ޓީމާ ގުޅިގެން އެ ދައްކާ ކުޅުމުން،" ގަލްޓިއޭ ބުންޏެވެ.
މި ސީޒަނުގެ ކުރީކޮޅުގައި ލަނޑުގެ ރެކޯޑްތަކަށް ބަލާއިރު، މެސީގެ އިތުރުން ކީލިއަން އެމްބާޕޭ އާއި ނޭމާ ވެސް ހުރީ ރަނގަޅު ފޯމެއްގަ އެވެ. ނޭމާ ވަނީ މި ސީޒަނުގައި 11 މެޗުން 11 ގޯލު ޖަހައި އަށް ގޯލު ޖަހަން ފުރުސަތު ހޯދައިދީފަ އެވެ. އެމްބާޕޭ ވަނީ މި ސީޒަނުގައި ކުުޅުނު ނުވަ މެޗުން 10 ގޯލު ޖަހައިފަ އެވެ.
