ލަންޑަން (ސެޕްޓެމްބަރު 18) - އިނގިރޭސި ޕްރިމިއާ ލީގުގައި މިއަދު ބްރެންޓްފޯޑް ދަނޑުގައި 3-0 އިން ހޯދި މޮޅާ އެކު އާސެނަލް އަލުން ލީގުގެ އެއް ވަނަ އަށް ޖެހިލައިފި އެވެ.
އާސެނަލް މި މެޗަށް ނުކުތްއިރު އޮތީ ލީގުގެ ތިން ވަނަ އަށް ވެއްޓިފަ އެވެ. އެއީ ލީގުގައި ރޭ މެންޗެސްޓާ ސިޓީ އާއި ޓޮޓެންހަމް ހޮޓްސްޕާސް ކުޅުނު މެޗުތަކުން މޮޅުވެފައިވާތީ އެވެ.
އާސެނަލް އަލުން އެއް ވަނަ އަށް އެރީ ހަތް މެޗުން 18 ޕޮއިންޓް ހޯދައިގެންނެވެ. ދެ ވަނައިގައި އޮތް މެންޗެސްޓާ ސިޓީ އާއި ތިން ވަނައިގައި އޮތް ޓޮޓެންހަމް އަށް ވަނީ ހަތް މެޗުން 17 ޕޮއިންޓް ލިބިފަ އެވެ.
ބްރެންޓްފޯޑްގެ ދަނޑުގައި އާސެނަލަށް ލީޑުނަގައިދިނީ މެޗުގެ 17 ވަަނަ މިނިޓްގައި ފްރާންސްގެ މިޑްފީލްޑަރު، ވިލިއަމް ސަލީބާ އެވެ. ބުކާޔޯ ސަކާ ކޯނަރަކުން ނެގި ބޯޅަ ސަލީބާ ބޮލުން ޖެހުމުން ގޯލަށް ވަނީ ދަނޑީގައި ވެސް ޖެހިފަ އެވެ. މިއީ މި ފަހަރު ލީގުގައި ސަލީބާ ޖެހި ތިން ވަނަ ގޯލެވެ.
ބްރެންޓްފޯޑްގެ ބެން މީ (ކ) ކައިރިން އާސެނަލްގެ ފަބިއޯ ވިއޭރާ ބޯޅަ ހިފައިގެންދަނީ.--- ފޮޓޯ: އޭއެފްޕީ
ފުރަތަމަ ހާފު ނިމުމުގެ ކުރިން އާސެނަލުން ވަނީ ދެ ވަނަ ގޯލެއް ވެސް ޖަހައިފަ އެވެ. މި ލަނޑު ޖެހީ މެޗުގެ 28 ވަނަ މިނިޓްގައި ގަބްރިއެލް ޖީސޫސް އެވެ. އާސެނަލްގެ ކެޕްޓަން ބޭންޑް އަޅައިގެން ކުޅުނު، ސްވިޒަލެންޑްގެ މިޑްފީލްޑަރު، ގްރޭނިޓް ޝާކާ އޭރިއާތެރެއަށް ހުރަސްކޮށްލި ބޯޅަ ޖީސޫސް ވަނީ ބޮލުން ގޯލުގެ މަތީ ކަނަށް އަމާޒުކޮށްލައިފަ އެވެ.
ބްރެންޓްފޯޑްގެ އެޓޭކްތައް ހުއްޓުވަން އާސެނަލުން ރަނގަޅު ކުޅުމެއް ދެއްކި މި މެޗުގައި، އާސެނަލުން ވަނީ ދެ ވަނަ ހާފްގެ ކުރީކޮޅުގައި ތިން ވަނަ ގޯލެއް ޖަހައިފަ އެވެ. އެ ގޮތުން މެޗުގެ 49 ވަނަ މިނިޓްގައި އާސެނަލްގެ ތިން ވަނަ ގޯލު ޖެހީ ޕޯޗުގީސް މިޑްފީލްޑަރު ފަބިއޯ ވިއޭރާ އެވެ. އޭރިއާބޭރުން ވިއޭރާ ޖެހި ބޯޅަ ގޯލަށް ވަނީ ދަނޑީގައި ވެސް ޖެހިފަ އެވެ. މިއީ ޕޯޓޯ ދޫކޮށް މި ފަހަރު އާސެނަލަށް ބަދަލުވި ވިއޭރާ އެ ޓީމަށް ޖަހައިދިން ފުރަތަމަ ގޯލެވެ.
އާސެނަލުން ވަނީ މެޗުގެ އިތުރު ވަގުތުގައި އުމުރުން 15 އަހަރުގެ އީތަން އެންވަނޭރީ ކުޅެން އަރުވައިފަ އެވެ. އޭނާ އަކީ ޕްރިމިއާ ލީގުގެ ތާރީހުގައި ވެސް މެޗެއްގައި ކުޅުނު އެންމެ ޒުވާން ކުޅުންތެރިޔާ އެވެ. މި މެޗުގައި ކުޅެން އެރިއިރު، އީތަންގެ އުމުރަކީ 15 އަހަރާއި 181 ދުވަހެވެ.
މިދިޔަ އަހަރު އާސެނަލުން ވަނީ ލީގުގެ ފުރަަތަމަ މެޗުގައި ބްރެންޓްފޯޑް އަތުން ބަލިވެފަ އެވެ. އެކަމަކު، މި ފަހަރު އެ ޓީމުން މި ވަނީ ބްރެންޓްފޯޑްގެ މައްޗަށް ފަސޭހަކަމާ އެކު ކުރިހޯދައިފަ އެވެ.
