ޗައިނާ ސަރުކާރުގެ ވަފުދަށް އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސަންދޯއް ބެލުމުގެ ފުރުސަތު ލިބޭނެ ކަމަށް އިނގިރޭސި ޕާލިމެންޓުން ބުނެފި އެވެ.
ހުކުރު ދުވަހު ބައެއް ނޫސްތަކުން ބުނީ އެ ފުރުސަތު ނުދޭން ނިންމާފައިވާ ކަމަށެވެ. އެކަމަކު ޕާލިމެންޓުން ހޮނިހިރު ދުވަހު ބުނީ ޗައިނާގެ ވަފުދަށް ވެސް ސަންދޯއް ބެލުމުގެ ފުރުސަތު ލިބޭނެ ކަމަށެވެ.
ނޫސްތަކުން ރިޕޯޓުކުރި ގޮތުގައި ފުރުސަތު ނުދޭން ހައުސް އޮފް ކޮމޮންސްގެ ރައީސް ސާ ލިންޑްސީ ހޮއިލް ނިންމެވީ ޗައިނާއިން ޕާލިމެންޓް މެމްބަރުންތަކަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ގުޅިގެންނެވެ.
މިދިޔަ އަހަރު ޗައިނާއިން ވަނީ އިނގިރޭސިވިލާތުގެ ނުވަ މީހުންގެ މުދާ ހިފަހައްޓައި، އެ ގައުމަށް އެތެރެވުން މަނާކޮށްފަ އެވެ. އޭގެ ތެރޭގައި އިނގިރޭސި ޕާލިމެންޓުގެ ހަތް މެމްބަރުން ހިމެނެ އެވެ. އެއީ އުއިގާ މުސްލިމުންނާ ދެކޮޅަށް ޗައިނާއިން އަމަލު ކުރާ ގޮތަށް ފާޑުކިޔުމުންނެވެ.
ރައްދުގަައި އިނގިރޭސިވިލާތުން ވަނީ ޗައިނާއިން އެ ގަައުމަށް ކަނޑައަޅާފައި ހުންނަ ސަފީރު އިނގިރޭސި ޕާލިމެންޓަށް ވަނުން މަނާކޮށްފަ އެވެ.
ޕާލިމެންޓުން ހޮނިހިރު ދުވަހު ބުނީ އެ ފިޔަވަަޅު އަޅާފައި ވަނީ ޗައިނާގެ ސަފީރާ ދެކޮޅަށް ކަމަށާއި ޗަައިނާގެ އެހެން އޮފިޝަލުންނަަށް ސަންދޯއް ބެލުމަށް ޕާލިމެންޓްގެ ވެސްޓްމިންސްޓާ ހޯލަށް ވަދެވޭނެ ކަމަށެވެ.
ސެޕްޓެމްބަރު އަށް ވަނަ ދުވަހު އަވަހާރަވި ރާނީ އެލިޒަބަތު ދެ ވަނައިގެ ސަންދޯއް މި ވަގުތު އޮތީ އިނގިރޭސި ޕާލިމެންޓުގެ ވެސްޓްމިންސްޓާ ހޯލްގަ އެވެ.
އެކަމަނާގެ ޖަނާޒާ އާއި ފަސްދާނުލުން އޮންނާނީ ސެޕްޓެމްބަރު 19 ގަ އެވެ. ޗައިނާގެ ރައީސް ޝީ ޖިންޕިންއަށް ވެސް ދައުވަތު ފޮނުވާފައިވާ އިރު، އެމަނިކުފާނު މިހާތަނަށް ޖަވާބެއް ނުދެއްވަ އެވެ. ޗައިނާގެ ފޮރިން މިނިސްޓްރީން ބުނީ އެ ގައުމުގެ އިސް ވަފުދެއް ފޮނުވުމާ މެދު ވިސްނަމުންދާ ކަމަށެވެ.
