ލަންޑަން (ސެޕްޓެމްބަރު 17) - އިނގިރޭސި ޕްރިމިއާ ލީގުގައި އެއް ކުޅުންތެރިއަކު މަދުކޮށް ކުޅުނު ވުލްވްސް އަތުން 3-0 އިން ހޯދި ފަސޭހަ މޮޅާ އެކު މެންޗެސްޓާ ސިޓީން ލީގުގެ އެއް ވަނަ އަށް ޖެހިލައިފި އެވެ.
އެންމެ ފަހުން ދެ ސީޒަނުގައި ލީގު ޗެމްޕިއަންކަން ހޯދި ސިޓީ އެއް ވަނަ އަށް އެރީ ހަތް މެޗުން 17 ޕޮއިންޓާ އެކު އެވެ. ދެ ވަނައިގައި އޮތީ ހަ މެޗުން 15 ޕޮއިންޓް ހޯދާފައިވާ އާސެނަލް އެވެ. މި ހަފްތާގައި އާސެނަލް ކުޅޭ މެޗު އޮތީ މާދަމާ ބްރެންޓްފޯޑާ ދެކޮޅަށެވެ.
ވުލްވްސް ދަނޑުގައި ކުޅުނު މެޗު ފަށައިގެން 55 ސިކުންތު ތެރޭގައި ސިޓީން ލީޑުނެގި އެވެ. މި ގޯލު ޖެހީ ޖެކް ގްރީލިޝް އެވެ. އަރިމަތިން ސިޓީގެ ޕްލޭމޭކަރު، ކެވިން ޑިބްރޭނާ އަށް ލިބުނު ބޯޅަ ގޯލު ކުރިމައްޗަށް ހުރަސްކޮށްލި ވަގުތު ގްރީލިޝް ވަނީ ގޯލުގެ ކައިރީ ކަނަށް އަމާޒުކޮށްލައިފަ އެވެ.
ނަތީޖާ ހަމަހަމަކުރެވޭތޯ ވުލްވްސް އިން ކުރިއަށް ޖެހިގެން ކުޅެމުން ދިޔަ ވަގުތެއްގައި މެޗުގެ 16 ވަނަ މިނިޓްގައި ސިޓީން ވަނީ ދެ ވަނަ ގޯލެއް ޖަހައި ލީޑުފުޅާކޮށްފަ އެވެ. މި ގޯލު ޖެހީ ރަނގަޅު ފޯމެއްގައި ހުރި ފޯވާޑް އާލިން ބްރައުޓް ހާލަންޑް އެވެ. އޭރިއާ ރޮނގުކައިރިން ހާލަންޑް ޖެހި ބޯޅަ އަމާޒުވީ ގޯލުގެ ތިރީ ކަނަށެވެ. މިއީ މި ފަހަރު ލީގުގައި ކުޅުނު ހަތް މެޗުން ހާލަންޑް ޖެހި 11 ވަނަ ގޯލެވެ. ހާލަންޑަކީ ޕްރިމިއާ ލީގުގެ ތާރީހުގައި ރަށުންބޭރުގައި ކުޅުނު ފުރަތަމަ ހަތަރު މެޗުގައި ލަނޑު ޖެހި ހަމައެކަނި ކުޅުންތެރިޔާ އެެވެ.
ކޮލިންސް (ކ) މެޗުގެ ތެރެއިން ގްރީލިޝް އަށް ކުރި ފައުލު: ކޮލިންސް އަށް ރަތެއް ދެއްކިއިރު، ތިން މެޗުގެ ސަސްޕެންޝަނެއް އައުމުގެ ފުރުސަތު ބޮޑު.
ވުލްވްސް އަށް މި މެޗުގައި މައްސަލަ ދިމާވީ މެޗުގެ 33 ވަަނަ މިނިޓްގައި އެ ޓީމުގެ ޑިފެންޑަރު، ނޭތަން ކޮލިންސް ކުރި ނުރައްކާތެރި ފައުލަކަށް އޭނާ އަށް ސީދާ ރަތް ކާޑެއް ދެއްކުމުންނެވެ. މަތިން އައި ބޯޅައެއް ޖަހަން ކޮލިންސް ނެގި ފައިން ޖެހުނީ ގްރީލިޝް ގައިގަ އެވެ. ރެފްރީ އެންތަނީ ޓޭލާ ނިންމީ ސީދާ ރަތެއް ދެއްކުމަަށެވެ.
އެއް ކުޅުންތެރިއަކު މަދުކޮށް ވެސް ވުލްވްސް އިން ދެ ވަނަ ހާުފުގައި އެޓޭކްތަކެއް ކޮށް ގޯލެއް ޖެހޭތޯ ބެލި އެވެ. އެ ގޮތުން ވުލްވްސްގެ ވިންގް، ޕެޑްރޯ ނެޓޯ އާއި ގޮންކާލޯ ގުއޭޑޭޝް އަށް ލިބުނު ބޯޅަތައް މާ ނުރައްކަލެއް ނުކުރެވުނެވެ.
ސިޓީގެ ތިން ވަނަ ގޯލު ޖެހީ މެޗުގެ 69 ވަނަ މިނިޓްގައި ފިލް ފޯޑެން އެވެ. މިއީ ޑިބްރޭނާ ގޯލު ކުރިމައްޗަށް ހުރަސްކޮށްލި ބޯޅައަކަށް އަރައި، ފޯޑެން ގޯލުގެ ދުރު ކަަަނަށް ބޯޅަ ފޮނުވާލައިގެން ޖެހި ގޯލެކެވެ.
ދާދި ފަހުން ވުލްވްސް އަށް ސޮއިކުރި ތަޖުރިބާކާރު ފޯވާޑް، ޑިއޭގޯ ކޮސްޓާ މި މެޗުގެ ސްކޮޑުގައި ނުހިމެނެ އެވެ. ވުލްވްސްގެ ކޯޗު ބްރޫނޯ ލާޖް ބުނީ ކުރިއަށް ހުރި މެޗުތަކުގައި ކޮސްޓާ ފެންނާނެ ކަމަށެވެ.
