ވެރިކަން ހިންގާ ނިޒާމު ބަރުލަމާނީއަށް ބަދަލުކުރުމުގެ މަސައްކަތް ހުއްޓާލާނީ އެކަން ކާމިޔާބު ކުރުމަށް ފަހުގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މީގެ ކުރިން ވިދާޅުވި ގޮތުގައި މަސައްކަތް ކުރައްވަނީ އަވަސް މަގުން ބަރުލަމާނީ ނިޒާމަކަށް ރާއްޖެ ބަދަލުކުރުމަށް ކަމަށެވެ. އެކަން ކުރުމަށް އެމްޑީޕީ ކޮންގްރެސްގެ ތެރެއިން ގަރާރެއް ހުށަހަޅުއްވަން މަސައްކަތް ކުރެއްވިނަމަވެސް ފަހު ވަގުތު ގަރާރު ވަނީ އަނބުރާ ގެންދަވާފަ އެވެ.
"އަޅުގަނޑު ދެކޭ ގޮތުގައި ރާއްޖޭގެ ރައީސްކަން ކޮށްގެން އަނެއްކާ ލިބޭނީ ބޮނޑިއެއް، އެކަމަކު ރާއްޖޭގައި ބަރުލަމާނީ ނިޒާމެއް، ޕާލަމެންޓަރީ ނިޒާމެއް ނޫން ގޮތަކަށް މި ރާއްޖޭގެ ވެރިކަން ހިންގޭނެ ކަމަކަށް އަޅުގަނޑަކަށް ލަފައެއް ނުކުރެވޭ،" ނަޝީދު ވިދާޅުވި އެވެ.
ރިޔާސީ އިންތިހާބަށް ވުރެ އަހައްމިޔަތު ކަން ދޭން ޖެހޭނީ ނިޒާމު ބަދަލުކުރުމުގެ ވޯޓަށް ކަމުގައި ދެކިވަޑައިގަންނަވާ ކަމަށް ވެސް ނަޝީދު ވިދާޅުވި އެވެ.
"ނިޒާމު ބަދަލުކުރުމުގެ މަސައްކަތް އަޅުގަނޑު ކުރާނަން، ދެން އަޅުގަނޑު ދެކޭނީ ކާމިޔާބުވާނެ ކަމަށް،" ނަޝީދު ވިދާޅުވި އެވެ.
ނަޝީދުގެ ވިސްނުން މީގެ ކުރިން ހުންނެވީ އަންނަ ފެބްރުއަރީ މަހުން ފެށިގެން އިންތިގާލީ ގޮތެއްގައި ނަމަވެސް އެ ނިޒާމަށް ބަދަލުކުރައްވާށެވެ. އެހެންނަމަވެސް އެ މަސައްކަތް އެ ވަގުތަށް ހުއްޓާލެއްވީ ރައީސް އިބްރާހިމް މުހައްމަދު ސޯލިހާ މަޝްވަރާ ކުރެއްވުމަށް ފަހު ރައީސްގެ އެދިވަޑައިގަތުމުގެ މަތީންނެވެ.
ރާއްޖޭގެ ވެރިކަމުގެ ނިޒާމު ބަރުލަމާނީއަށް ބަދަލުކުރަން މަސައްކަތް ފަށަން އެމްޑީޕީގެ ކޮންގްރެސްއަށް ނަޝީދު ހުށަހެޅުއްވަން މަސައްކަތް ކުރެއްވި ގަރާރުގައިވާ ގޮތުން ސަރުކާރުގެ އެންމެ އިސްވެރިއަކީ މަޖިލީހުގެ ތެރެއިން އިންތިހާބުކުރާ ބޮޑުވަޒީރެކެވެ. އަދި ދައުލަތުގެ އެންމެ އިސްވެރިއެއްގެ ގޮތުގައި ހުންނާނީ ރައްޔިތުންގެ މެދުގައި ނަގާ ރިޔާސީ ވޯޓަކުން ހޮވޭ ބޭފުޅެކެވެ.
ބޮޑުވަޒީރާއި ރައީސްގެ ބާރުތައް ކަނޑައެޅުމަށާއި މަޖިލީހުގެ ދާއިރާތައް ތަމްސީލުވާނެ ގޮތްތަކާއި މަޖިލިސް އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި، ހާއްސަ ކުރެވޭ "ނެޝަނަލިސްޓު ލިސްޓު"ގެ މެންބަރުން ހިމެނޭ އުސޫލު ކަނޑައަޅަން ވެސް އެ ގަރާރުގައިވެ އެވެ.
