އިންޑިއާއިން ޗީތާ ނެތިގެން ދިޔަތާ 70 އަހަރު ފަހުން، ބޮޑު ވަޒީރު ނަރެންދްރަ މޯދީގެ އުފަން ދުވަހާ ދިމާކޮށް، ހޮނިހިރު ދުވަހު އެ ގައުމަށް ޗީތާތަކެއް ގެންގޮސްފި އެވެ.
އިންޑިއާގައި އުޅުނު ޗީތާތައް ނެތިގެން ދިޔަ ކަމަށް ރަސްމީކޮށް އިއުލާން ކުރީ 1952 ވަނަ އަހަރު އެވެ. އޭގެ 70 އަހަރު ފަހުން އެ ގައުމަށް ގެންދިޔައީ އެފްރިކާގެ ނަމީބިއާގައި ދިރިއުޅުނު ޗީތާތަކެކެވެ.
ސެޕްޓެމްބަރު 17 އަކީ މޯދީ, 72, ގެ އުފަން ދުވަސް ކަމަށް ވާއިރު، މި ދުވަހުގެ ހެނދުނުގެ ވަގުތެއްގައި ނަމީބިއާގެ އަށް ޗީތާ އިންޑިއާއަށް ގެންދިޔައީ ގިނަ ތައްޔާރީތަކަށްފަހު އެވެ.
އިންޑިއާގައި އެއް މަސް ވަންދެން އެ ޗީތާތައް ކަރަަންޓީނު ކުރާނެ އެވެ. އެ ޖަނަވާރުތައް އޭގެ ފަހުން ދިރިއުޅޭނީ އިންޑިއާގެ މެދުތެރޭގައި އޮންނަ ބޮޑު ނޭޝަނަލް ޕާކެއްގަ އެވެ.
ކާނިވޯ ނުވަތަ މަސް ކާ އެއް ގަމުގައި އުޅޭ ބޮޑު ޖަނަވާރެއް މީގެ ކުރިން ދުވަހަކު ވެސް އެއް ބަައްރުން އަނެއް ބައްރަށް ގެންގޮސް، ޖަންގަލީގެ ތެރެއަށް ދޫކޮށްލާފައެއް ނުވެ އެވެ.
ޖުމްލަ 20 ޗީތާ އިންޑިއާއަށް ގެންދަން ރާވާފައި ވަނީ ދެކުނު އެފްރިކާ އަދި ނަމީބިއާއިންނެވެ. ހޮނިހިރު ދުވަހު ގެންދިޔަ އަށް ޗީތާއަކީ އޭގެ ފުރަތަމަ ގްރޫޕެވެ.
ހޮނިހިރު ދުވަހު ގެންދިޔައީ ފަސް އަންހެން ޗީތާ އާއި ތިން ފިރިހެން ޗީތާ އެވެ. އެއީ އުމުރުން ދެ އަހަރާއި ހަ އަހަރާ ދެމެދުގެ ޗީތާތަކެކެވެ.
ނަމީބިއާގެ ވިންހޮކްއިން ފުރައިގެން އެ ޗީތާތައް ގެންދިޔަައީ ގްވާލިއޯ ސިޓީއަށެވެ. ހާއްސަ ބަދަލުތަކެއް ގެނެސްފައިވާ ބޮއިންގް 747 ބޯޓެއްގައި ޗީތާތައް އުފުލި އިރު، ބޯޓުގައި ތިން ބަޔޮލޮޖިސްޓިންނާއި ޖަނަވާރުންގެ ޑޮކްޓަރުންނާއި، ވަލު ޖަނަވާރާ ގުޅޭ ތަޖުރިބާކާރުން ވެސް ތިއްބެވެ.
ގްވާލިއޯއިން ހެލިކޮޕްޓަރުގެ އެހީގައި ޗީތާ ގެންދިޔައީ މަދްޔާ ޕްރަދޭޝް ސްޓޭޓުގެ ކޫނޯ ނޭޝަނަލް ޕާކަށެވެ. އެ ތަނަށް އެ ޖަނަވާރުތައް ދޫކޮށްލާނީ މޯދީ ޝަރަރުވެރި ކުރައްވާ ރަސްމިއްޔާތެއްގަ އެވެ.
ޗީތާއަކީ އެންމެ ބާރަށް ދުވާ އެއްގަމުގައި އުޅޭ ޖަނަވާރެވެ. އެއަށް ގަޑިއަކު 70 މޭލު ބާރު މިނުގައި ދަަތުރު ކުރެވެ އެވެ. ނަމަވެސް އެއީ ނެތިދިޔުމުގެ ނުރައްކާ އޮތް ޖަނަވާރެކެވެ.
މިހާރު ދުނިޔޭގައި އުޅެނީ އެންމެ 7000 ޗީތާ ކަމަށް ވެ އެވެ. އޭގެ ތިންބައި ކޮށްފައި އެއްބައި އުޅެނީ ނަމީބިއާ އަދި ދެކުނު އެފްރިކާގަ އެވެ.
އިންޑިއާގައި ޒަމާނުއްސުރެ އުޅުނު ޗީތާތައް ނެތި ދިޔައީ ޝިކާރަ ކުރުމާއި، ޖަންގަލީގެ މާހައުލަށް ގެއްލުންވުމާއި، ކާތަކެތި ލިބުން ދަތިވުން ފަދަ ކަންކަމާ ހެދި އެވެ.
އިންޑިއާގައި އުޅުނު ވައްތަރު އޭޝިއެޓިކް ޗީތާ މީގެ ކުރިން އަަރަބި ގައުމުތަކާއި އަފްގާނިސްތާނުން ވެސް ފެނުނެވެ. އެކަމަކު އެ ވައްތަރުގެ ޗީތާ މިހާރު އުޅެނީ ހަމައެކަނި އިރާނުގަ އެވެ.
މި އަހަަރު އިރާނުގެ އޮފިޝަލުން ބުނީ އެ ގައުމުގައި މިހާރު އުޅެނީ އެންމެ 12 އޭޝިއެޓިކް ޗީތާ ކަމަށެވެ.
