ޗައިނާ ސަރުކާރުގެ ވަފުދަކަށް އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސަންދޯއް ބެލުމުގެ ފުރުސަތު ނުދޭން ނިންމައިފި އެވެ.
އެ ފުރުސަތު ނުދޭން ހައުސް އޮފް ކޮމޮންސްގެ ރައީސް ސާ ލިންޑްސީ ހޮއިލް ނިންމެވީ ޗައިނާއިން ޕާލިމެންޓް މެމްބަރުންތަކަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ގުޅިގެންނެވެ.
ސެޕްޓެމްބަރު އަށް ވަނަ ދުވަހު އަވަހާރަވި ރާނީ އެލިޒަބަތު ދެ ވަނައިގެ ސަންދޯއް މި ވަގުތު އޮތީ އިނގިރޭސި ޕާލިމެންޓުގެ ވެސްޓްމިންސްޓާ ހޯލްގަ އެވެ.
އެކަމަނާގެ ޖަނާޒާ އާއި ފަސްދާނުލުން އޮންނާނީ ސެޕްޓެމްބަރު 19 ގަ އެވެ. ޖަނާޒާގައި ބައިވެރިވުމާ މެދު ޗައިނާއިން އަދި ވަކި ގޮތެއް ނުނިންމަ އެވެ.
ޗައިނާ ސަރުކާރުގެ ތަރުޖަމާނު މާއޯ ނިންގް ވިދާޅުވީ އެ ގައުމުގެ ވަފުދަށް ސަންދޯއް ބެލުން މަނާކުރިކަން އެނގިފައި ނުވާ ކަމަށެވެ. އެ ހަބަރު އެންމެ ފުރަތަމަ ރިޕޯޓު ކުރީ ޕޮލިޓިކޯ ނޫހުންނެވެ.
"ޑިޕްލޮމެޓިކް ޕްރޮޓޮކޯލްތަކާއި މެހެމާނުންނާ މެދު އަމަލު ކުރަން ޖެހޭ އެންމެ ރަނގަޅު ގޮތް އިނގިރޭސިވިލާތަށް ވަރަށް ސާފުކޮށް އެނގޭނެ،" އޭނާ ވިދާޅުވި އެވެ.
މިދިޔަ އަހަރު ޗައިނާއިން ވަނީ އިނގިރޭސިވިލާތުގެ ނުވަ މީހުންގެ މުދާ ހިފަހައްޓައި، އެ ގައުމަށް އެތެރެވުން މަނާކޮށްފަ އެވެ. އޭގެ ތެރޭގައި އިނގިރޭސި ޕާލިމެންޓުގެ ހަތް މެމްބަރުން ހިމެނެ އެވެ. އެއީ އުއިގާ މުސްލިމުންނާ ދެކޮޅަށް ޗައިނާއިން އަމަލު ކުރާ ގޮތަށް ފާޑުކިޔުމުންނެވެ.
ރައްދުގަައި އިނގިރޭސިވިލާތުން ވަނީ ޗައިނާއިން އެ ގަައުމަށް ކަނޑައަޅާފައި ހުންނަ ސަފީރު އިނގިރޭސި ޕާލިމެންޓަށް ވަނުން މަނާކޮށްފަ އެވެ.
