ލަންޑަން (ސެޕްޓެމްބަރު 14) - ޔުއެފާ ޗެމްޕިއަންސް ލީގުގައި މިރޭ ޗެލްސީން އާ ކޯޗު ގްރަހަމް ޕޮޓާގެ އިރުޝާދުގެ ދަށުން ކުޅުނު ފުރަތަމަ މެޗުގައި 1-1 އިން ރެޑްބުލް ސަލްޒްބާގާ އެއްވަރުވިއިރު، އާލިން ބްރައުޓް ހާލަންޑް ޖެހި ގޯލުން މެންޗެސްޓާ ސިޓީން ފަހަތުން އަރައި 2-1 ބޮރޫޝިއާ ޑޯޓްމަންޑް ބަލިކޮށްފި އެވެ.
ސިޓީ ދަނޑުގައި މިރޭ ކުޅުނު މެޗުގެ 56 ވަނަ މިނިޓްގައި ޑޯޓްމަންޑުން ވަނީ ލީޑުނަގައިފަ އެވެ. މި ގޯލު ޖެހީ މާކޯ ރެއުސް ނެގި ހުރަހަކުން އިނގިރޭސި މިޑްފީލްޑަރު ޖޫޑް ބެލިންހަމް ބޮލުންނެވެ. ޑޯޓްމަންޑް މި ލީޑާ އެކު ރަނގަޅަށް ކުޅެ އިތުރު ގޯލެއް ޖެހޭތޯ ވެސް ބެލި އެވެ. އެކަމަކު، އެކަން ކާމިޔާބުނުވި އެވެ.
މެޗުގެ ފަހު 10 މިނިޓްގެ ތެރޭ ސިޓީން ވަނީ ދެ ގޯލު ޖަހައި ނަތީޖާ އަނބުރާލައިފަ އެވެ. ސިޓީ އަށް އެއްވަރުކޮށްދިނީ މެޗުގެ 80 ވަނަ މިނިޓްގައި، ޖޯން ސްޓޯންސް އޭރިއާބޭރުން ޖެހި ގޯލުންނެވެ. އެ ގޯލު ޖެހިތާ ހަތަރު މިނިޓް ފަހުން ޔޮއާއޯ ކަންސޭލޯ ނެގި ހުރަހަކުން ހާލަންޑް ވަނީ ސިޓީ މޮޅުވި ގޯލު ޖަަހައިފަ އެވެ. މިއީ މި ފަހަރުގެ ޓްރާންސްފާގައި ޑޯޓްމަންޑް ދޫކޮށް ސިޓީ އަށް ބަދަލުވި ހާލަންޑް ކުރީގެ ޓީމާ ދެކޮޅަށް ކުޅުނު ފުރަތަމަ މެޗެވެ.
މި ގްރޫޕްގެ އަނެއް މެޗުގައި ޑެންމާކުގެ ކޯޕެންހާގެން ވަނީ އަމިއްލަ ދަނޑުގައި ސްޕެއިންގެ ސެވިއްޔާއާ 0-0 އިން އެއްވަރުވެފަ އެވެ.
ސަލްޒްބާގްގެ ކުޅުންތެރިއަކު ކައިރިން ޗެލްސީގެ ސްޓާލިން (ވ) ބޯޅަ ހިފައިގެންދަނީ.--- ފޮޓޯ: އަދަދު
ޗެލްސީ ދަނޑުގައި މިރޭ ކުޅުނު މެޗުގެ 48 ވަނަ މިނިޓްގައި އެ ޓީމަށް ލީޑުނަގައިދިނީ ރަހީމް ސްޓާލިން އެވެ. މިއީ ޗެލްސީގެ ފޯވާޑް، ޕިއޭ އެމެރިކް އޮބާމަޔަން އަރިމަތިން ނެގި ހުރަހެއް، ސަލްޒްބާގް ޑިފެންޑަރުންނަށް ސަލާމަތްނުކުރެވި، ސްޓާލިން އަށް ލިބުމުން އޭނާ ޖެހި ގޯލެކެވެ. މެޗުގެ 75 ވަނަ މިނިޓްގައި ސަލްޒްބާގަށް އެއްވަރުކޮށްދިން ގޯލު ޖެހީ ނޯއާ އޮކަފޯ އެވެ. ޗެލްސީގެ ތިއާގޯ ސިލްވާ ކައިރިން ނައްޓާލުމަށް ފަހު ޖޫނިއާ އަޑަމޫ ނެގި ހުރަހަކުން އޮކަފޯ ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.
މިއީ 1999-2000 ވަނަ އަހަރުގެ ސީޒަނަށް ފަހު ޗެމްޕިއަންސް ލީގުގެ ފުރަތަމަ ދެ މެޗުން މޮޅެއް ނުލިބި ފަށަން ޖެހުނު ފުރަތަމަ ފަހަރެވެ. ޗެލްސީ ފުރަތަމަ މެޗުން ކްރޮއޭޝިއާގެ ޗެމްޕިއަން، ޑިނަމޯ ޒަގްރެބް އަތުން ބަލިވިއިރު، އެ މެޗަށް ފަހު އެ ޓީމުގެ ކޯޗަކަށް ހުރި ތޯމަސް ޓުޗެލް ވަނީ ވަކިކޮށްފަ އެވެ.
ޗެލްސީ ގްރޫޕްގައި ހިމެނޭ އިޓަލީގެ ޗެމްޕިއަން އޭސީ މިލާނުން ވަނީ މިރޭ އަމިއްލަ ދަނޑުގައި ޑިނަމޯ ޒަގްރެބް އަތުން 3-1 އިން މޮޅުވެފަ އެވެ. އޮލީވިއޭ ޖިރޫޑް ޕެނަލްޓީން މިލާން ލީޑުނެގި މި މެޗުގައި އެ ޓީމުގެ ދެ ވަނަ ގޯލު ޖެހީ އަލެކްސިސް ސަލަމޭކާ އެވެ. މިސްލާވް އޯރްސިޗްގެ ގޯލުން ޑިނަމޯ ޒަގްރެބް އަށް އުންމީދެއް ލިބުނު ނަމަވެސް މިލާންގެ ޓޮމާސޯ ޕޮބޭގާ ވަނީ އެ ޓީމަށް އިތުރު ގޯލެއް ޖަހައިދީ ތިން ޕޮއިންޓް ޔަގީންކޮށްދީފަ އެވެ.
ގްރޫޕް އޭގައި ނަޕޯލީން ވަނީ މިރޭ ރަށުންބޭރުގައި 3-0 އިން ރޭންޖާސް ބަލިކޮށްފަ އެވެ. ދެ ވަނަ ހާފުގެ ކުރީކޮޅުގައި ރޭންޖާސްގެ ޖޭމްސް ސޭންޑްސް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކި މި މެޗުގައި ނަޕޯލީން ތިން ގޯލު ވެސް ޖެހީ ރޭންޖާސްގެ އެއް ކުޅުންތެރިއަކު މަދުވި ފަހުންނެވެ. ރޭންޖާސްގެ ކީޕަރު އެލަން މެކްގްރެގާ ވަނީ ނަޕޯލީގެ ޕިއޮޓްރޭ ޒިއެލިންސްކީ ފޮނުވާލި ޕެނަލްޓީ މަތަކޮށްފަ އެވެ. އެކަމަކު، މަޓެއޯ ޕޮލިޓާނޯ ވަނީ އެ ޓީމަށް ލިބުނު އަނެއް ޕެނަލްޓީ ވައްދާލައިފަ އެވެ. ނަޕޯލީގެ އަނެއް ދެ ގޯލު ޖެހީ ޖިއަކޯމޯ ރަސްޕަޑޯރީ އާއި ޓަންގީ އެންޑޮމްބެލޭ އެވެ.
