އެމެރިކާގެ ޑްރޯން ހަމަލާއެއްގައި އިރާނުގެ އަސްކަރީ ޖެނެރަލް ގާސިމް ސުލައިމާނީ އަވަހާރަކޮށްލުމުން، ބަދަަލު ހިފުމުގެ ގޮތުން އެމެރިކާގެ ކުރީގެ ރަައީސް ޑޮނަލްޑް ޓްރަމްޕް އަވަހާރަކޮށްލަން އިރާނުން ހަމަލާއެއް ދީފާނެތީ އެމަނިކުފާނު ކަންބޮޑުވެވަޑައިގެންނެވިކަން ހާމަަވެއްޖެ އެވެ.
އެކަން ހާމަވީ ނެރެން ހަމަޖެހިފައިވާ "ދަ ޑިވައިޑާ: ޓްރަމްޕް އިން ދަ ވައިޓް ހަައުސް 2017-2021" ފޮތުންނެވެ. އެ ފޮތުގައިވާ ގޮތުން ސުލައިމާނީ އަވަހާރަކޮށްލަން ދިން ހަމަލާއަށް ފަހު އިތުރު ހަމަލާތަކެއް އިރާނަށް ދިނުމާ މެދު ޓްރަމްޕް އާއި އެޑްވައިޒަރުން ވިސްނަމުން ދިޔަ އެވެ. އެކަމަކު އެންމެ ފަހު ވަގުތު ނިންމީ އިތުރު ހަމަލާތައް ނުދިނުމަށެވެ.
އެ ފޮތް އެމެރިކާގައި ނެރުމަށް ހަމަޖެހިފައި ވަނީ އަންނަަ ހަފުތާގަ އެވެ. އެހެން ނަމަވެސް އިނގިރޭސިވިލާތުގެ ދަ ގާޑިއަން ނޫހުން ވަަނީ ޝާއިއުކުރުމުގެ ކުރިން ފޮތުގެ ކޮޕީއެއް ހޯދާފަ އެވެ. އެ ފޮތް ލިޔުނީ ދެމަަފިރިން ކަމުގައިވާ ޕީޓާ ބާކާ އާއި ސޫޒަން ގްލާސާާ އެވެ.
ފޮތުގައިވާ ގޮތުން އިރާނަށް ދިން ހަމަލާއާ ގުޅޭ ގޮތުން ޓްރަމްޕް ފަަހުރުވެރިކަމާާ އެކު އާއްމުކޮށް ވާހަކަ ދެއްކެވި ނަމަވެސް، ފަަރުދާގެ ފުރަގަހުގައި އެމަނިކުފާނަށް ބޮޑު ބިރަކާ ކުރިމަތިވެވަޑައިގެންނެވި އެވެ.
ބޭކާ އާއި ގްލާސާގެ ފޮތުގައި ވަނީ އިރާނާ މެދު ޓްރަމްޕް ގެންގުޅުއްވި ސިޔާސަަތު ވަރަށް ބޮޑަށް ގެނެސްދީފަ އެވެ. އެގޮތުން ނިޔުކްލިއާ އެއްބަަސްވުމާ މަޝްވަރާ އާއި މޭ 2018 ގައި އެއްބަސްވުމަށް އަމަލު ނުކުރަން ނިންމުމާއި ޖޫން 2019 ގައި އިރާނަށް ވައިގެ ހަމަލާ ދޭން ނިންމުމަށް ފަހު އެންމެ ފަހު ވަގުތު އެ ނިންމުން އަނބުރާ ގެންދިޔަ ގޮތް ތަފްސީލްކޮށްދީފައިވެ އެވެ.
އެހެން ނަމަވެސް ސުލެއިމާނީ އަވަހާރަކޮށްލަން ހަމަލާ ދޭން ކުރި އަމުރު އަނބުރާ ނުގެންދެ އެވެ. ހަމަލާއަށް ފަހު އެމެރިކާއިން ބުނީ ސުލެއިމާނީ ގެންދެވީ އިރާނާއި މެދުއިރުމަތީގައި އެމެރިކާގެ ޑިޕްލޮމެޓުންނާއި އެހެން އޮފިޝަލުންނަށް ހަމަލާ ދޭން ރާވަމުން ކަމަށެވެ.
ސުލެއިމާނީއަކީ އިރާނުގެ ރިވޮލިއުޝަނަރީ ގާޑުންގެ ގުދުސް ފައުޖުގެ ކުރީގެ ކޮމާންޑަރެވެ. ގުދުސް ފައުޖަކީ ޓެރަރިސްޓް ޖަމާއަތެއް ކަމަށް އެމެރިކާއިން ދެކެ އެވެ.
އޭނާ އަވަހާރަވީ ޖެނުއަރީ 3، 2020 ގައި ބަގްދާދް އެއާޕޯޓުން ނިކުމެވަޑަައިގަންނަވަނިކޮށެވެ. އޭނާއާ އެކު އިރާގުގެ ބަޔަކު ވެސް މަރުވި އެވެ. ސުލެއިމާނީ އަވަހާރަވުމުން އިރާނާއި އެމެރިކާގެ މަޝްރަހު އިތުރަށް ގޯސްވެ، ހަނގުރާމައެއް ބިރު އުފެދުނެވެ.
އިރާނުގެ ރޫހާނީ ލީޑަރު އާޔަތުﷲ އަލީ ހާމަނާާއީ ވިދާޅުވީ އެއީ އަނިޔާވެރި ހަމަލާާއެއް ކަމަށެވެ. އަދި ތިން ދުވަސް ވަންދެން އިރާނުގައި ގައުމީ ހިތާމަަ ފާޅުކުރުން އޮތެވެ.
އެ ހަމަލާއާ ގުޅިގެން އެމެރިކާގެ އެއްވުންތަކުގައި ޓްރަމްޕް ފަހުރުވެރިކަމާ އެކު ވާހަކަ ދައްކަވަމުން ގެންދެވި އެވެ. އެ އަހަރުގެ ފަހުކޮޅު އިރާނުގެ ރޫހާނީ ލީޑަަރު ވިދާޅުވީ ހަމަލާއަށް އަމުރު ކުރި އަދި ހަމަލާ ހިންގި އެންމެންނަށް އަދަބު ދޭން ޖެހޭނެ ކަމަށެވެ.
"ބަދަލު ހިފުން އަންނާނީ އެންމެ ރަނގަޅު ވަގުތުގައި،" އާޔަތުﷲ އަލީ ހާމަނާއީގެ ޓްވީޓެއްގައި ވިދާޅުވި އެވެ.
