ފުވައްމުލަކު ސިޓީ، ދަނޑިމަގު ޗަސްބިން ސަރަހައްދުގައި އަލިފާން ރޯވެގެން، ނިއްވުމުގެ މަސައްކަތް އެމްއެންޑީއެފުން ފަށައިފި އެވެ.
ރޯވާ މައްސަލަ އާންމުވެފައިވާ، އެ ސަރަހައްދު އަނދަމުން ދަނިކޮށް މިއަދު އެމްއެންޑީއެފް އަށް ރިޕޯޓުކޮށްފައިވަނީ 15:35 ހާއިރު އެވެ.
އެންއެންޑީއެފުން އާންމުކޮށްފައިވާ ފޮޓޯތަކުން ޗަސްބިމުގެ ބޮޑު ސަރަހައްދެއްގައި ރޯވެ، އަލިފާންގަނޑު ވަނީ ފެތުރިފަ އެވެ. އަލިފާން ނިއްވުމުގެ މަސައްކަތް މިހާރު ކުރިއަށްދާ ކަމަށް ވެސް އެމްއެންޑީއެފުން ވަނީ ބުނެފަ އެވެ.
އަލިފާން ރޯވެފައިވާ ފުވައްމުލަކު ޗަސްބިން ސަރަހައްދު: މި ސަރަހައްދުގައި ކުނާ ވިޔަން ބޭނުންކުރާ ހައި އާއި އެކި ޒާތުގެ ގަސް ހެދިފައި ހުރޭ ފޮޓޯ/ އެމްއެންޑީއެފް
ދަޑިމަގު ޗަސްބިމުގައި ކޮންމެ އަހަރަކު ކަހަލަ ގޮތަކަށް ރޯވާ މައްސަލައިގައި ކަންބޮޑުވުން ފާޅުކޮށް އެރަށުގެ ކައުންސިލުން ވަނީ އެއީ ބަޔަކު ކުރާ ކަމެއްގެ ގޮތުގައި ތުހުމަތުކޮށްފަ އެވެ. އެ ސަރަހައްދަކީ ގިނަ އަދަދަކަށް ގަސް އޮންނަ ސަރަހައްދަކަށް ވާތީ މިގޮތަށް ރޯވާ ފަހަރުތަކުގައި ބޮޑު ސަރަހައްދެއްގައި ރޯވެ އަލިފާންގަނޑު ފެތުރެ އެވެ.
