ޗައިނާގެ ރައީސް ޝީ ޖިންޕިން އާއި ރަޝިއާގެ ރައީސް ލެޑިމިއަ ޕުޓިން ބައްދަލުކުރައްވައި ޔޫކްރެއިން ހަނގުރާމަ އާއި "ބައިނަލްއަގްވާމީ އަދި ސަރަހައްދީ މައުލޫއުތަކާ" ގުޅޭ ގޮތުން މަޝްވަރާ ކުރައްވާނެ ކަމަށް ރަޝިއާއިން ބުނެފި އެވެ.
ދެ ލީޑަރުން ބައްދަލުކުރައްވާނީ އުޒްބެކިސްތާނުގައި އޮންނަ ސަމިޓެއްގެ ތެރެއިންނެވެ. ރަޝިއާއިން ބުނީ އެ ސަމިޓަކީ ދުނިޔޭގައި އޮތީ ހުޅަނގުގެ ގައުމުތައް އެކަނި ނޫންކަން އަންގައިދޭ ބޮޑު އެއްވުމެއް ކަމަށެވެ.
މިއީ ކޮވިޑް ބަލިމަޑުކަން ފެށުނު ފަހުން ޝީ ޗައިނާއިން ބޭރަށް ކުރައްވާ ފުރަތަމަަ ދަަތުރެވެ. ޝީ މިހާރު މަސައްކަތް ކުރައްވަނީ ތިން ވަނަ ދައުރަކަށް ރައީސްކަމުގައި ހުންނެވުމަށޭވެ.
ޗައިނާއިން ބުނީ ތިން ދުވަހުގެ ދަތުރެއްގައި ޝީ ބުދަ ދުވަހު އެންމެ ފުރަތަމަ ވަޑައިގެންނެވީ ކަޒަކިސްތާނަށް ކަމަށެވެ. އޭގެ ފަހުން ޕުޓިންއާ ބައްދަލުކުރައްވާނީ ބުރާސްފަތި ދުވަހު ޝަަންހާއީ ކޯޕޮރޭޝަން އޯގަނައިޒޭޝަން (ސީއެސްއޯ) ސަމިޓްގެ ތެރެއިންނެވެ. އެ ސަމިޓް އޮންނާނީ ސަމަރްހާންދްގައި ސެޕްޓެމްބަރު 15-16 ގަ އެވެ.
ރަޝިއާއިން ބުނީ ޝީގެ އިތުރުން އިންޑިއާގެ ބޮޑު ވަޒީރު ނަރެންދްރަ މޯދީ އާއި ޕާކިސްތާން، ތުރުކީ އަދި އިރާނުގެ ވެރިންނާ ވެސް ޕުޓިން ބައްދަލުކުރައްވާނެ ކަމަށެވެ. ރަޝިއާ ސަރުކާރުގެ ތަރުޖަމާނު ޔޫރީ އުޝަކޯވް ވިދާޅުވީ ޝީއާ އެކު ބާއްވާ ބައްދަލުވުން ވަކިން ހާއްސަ ވާނެ ކަމަށެވެ.
