ލަންޑަން (ސެޕްޓެމްބަރު 14) - ޗެލްސީ ބޭނުންވާ ލެވަލްގައި އެ ޓީމު ބާއްވައިގެން ބޭނުންވާ މިސްރާބަށް ގެންދަން ކުރަން ޖެހޭ މަސައްކަތް އޭނާ އަށް ކުރެވޭނެ ކަމަށް ދާދި ފަހުން ޗެލްސީއާ ހަވާލުވި އިނގިރޭސި ކޯޗު ގްރަހަމް ޕޮޓާ ބުނެފި އެވެ.
ޗެލްސީގެ ކޯޗުކަމުން ތޯމަސް ޓުޗެލް ވަކިކުރަަން އެ ކްލަބްގެ ބޯޑުން ނިންމީ އެ ކްލަބްގެ ވެރިޔާ ޓޮޑް ބޯލީގެ ތަސައްވުރާ އެއްގޮތަށް ކުރިއަށްދެވޭނެ ކޯޗެއް ގެނައުމަށެވެ. އެ ގޮތުން ބޯލީ އިހުތިޔާރުކުރީ ބްރައިޓަންގެ ކޯޗަކަށް ހުރި ޕޮޓާ އެ ޓީމަށް ގެންނާށެވެ. ފަސް އަހަރުގެ ކޮންޓްރެކްޓެއްގައި ޕޮޓާ ޗެލްސީ ކޯޗަކަށް ގެނައިއިރު، ބްރައިޓަންގައި އޭނާއާ އެކު މަސައްކަތްކުރި ކޯޗިން ޓީމު ވެސް ވަނީ ޗެލްސީ އަށް ބަދަލުވެފަ އެވެ.
ޕޮޓާ، ޗެލްސީ ގޮވައިގެން ނުކުންނާނެ ފުރަތަމަ މެޗަކީ އޮސްޓްރިއާގެ އާރްބީ ސަލްޒްބާގްއާ ދެކޮޅަށް މިރޭ ޗެމްޕިއަންސް ލީގުގައި ކުޅޭ މެޗެވެ. ޓުޗެލް އަށް ޗެލްސީގެ ކޯޗުކަން ގެއްލުނީ ޗެމްޕިއަންސް ލީގުގައި މި ފަހަރު ޗެލްސީން ކުޅުނު ފުރަތަމަ މެޗުގައި ކްރޮއޭޝިއާގެ ޑިނަމޯ ޒަގްރެބް އަތުން ބަލިވުމުންނެވެ.
ޔޫރަޕްގެ ފުޓްބޯޅަ މުބާރާތެއްގައި ޕޮޓާގެ ހަމައެކަނި ތަޖުރިބާ އަކީ އޭނާ ސްވިޑެންގެ އޮސްޓަސަންޑާ ހަވާލުވެހުރިއިރު، އެ ޓީމު ގޮވައިގެން ޔޫރޮޕާ ލީގުގައި ވާދަކުރުމެވެ.
"އަހަރެންގެ ޗެމްޕިއަންސް ލީގުގެ ތަޖުރިބާ މި ވަގުތަށް ބަލާއިރު ހުރީ ސަޕޯޓަރެއްގެ ލެވަލްގައި. މިއީ އަހަރެންގެ ވާހަަކަ ދައްކަން ޖެހޭ ވަގުތެއް ނޫން. މިއީ ޗެލްސީގެ ވާހަކަ ދައްކަން ޖެހޭ ވަގުތު. އަހަންނަށް އެނގޭ މި ކްލަބްގެ ޑިމާންޑްތައް ހުރި ލެވަލް، އަހަންނަށް މި ލެވަލްގައި ވެސް މަސައްކަތް ކުރެވިދާނެކަން ސާބިތުކޮށްދޭން ބޭނުން،" ކުރިން ސްވަންސީ ސިޓީ އަށް ވެސް ކޯޗުކޮށްދިން ޕޮޓާ ބުންޏެވެ.
ޗެލްސީގެ ކޯޗުކަމުން ޓުޗެލް ވަކިކުރަން، އެ ކްލަބްގެ ސީނިއާ މެނޭޖްމަންޓުން ނިންމީ މި ސީޒަން ފެށިއިރު، ޓްރާންސްފާ މާކެޓްގައި 291 މިލިއަން ޑޮލަރު ހަރަދުުކުރުމަށް ފަހު ވެސް ބޭނުންވާ ނަތީޖާތައް ނުނެރެވޭތީ އެވެ.
"ޗެލްސީން ކާމިޔާބު ހޯދުމުގައި ކަންކަން ކުރަމުން އައި ގޮތަށް ބަލާއިރު، މި ކްލަބްގައި އޮތީ ހަރަދުކުރުމުގެ ސަގާފަތެއް، އެހެންވީމަ މި ޓީމާ ހަވާލުވާން ޖެހޭނީ މި ކްލަބްގެ ހުރިހާ ކަމަކަށް ލޯ ހުޅުވިފައި ހުރެގެން. އަހަރެން މި ވިސްނަނީ މި ކްލަބާ އެކު ކާމިޔާބު ކުރިމަގަކަށް،" ޕޮޓާ ބުންޏެވެ.
ޗެލްސީގެ އާ ވެރިންނަށް އެ ކްލަބްގެ ބައެއް ސަޕޯޓަރުން ފާޑުކިޔަމުން އަންނަ އެއް ސަބަބަކީ ޓުޗެލް އަށް އެކަށީގެންވާ ވަގުތު ނުދީ މަގާމުން ވަކިކުރުމެވެ. ޗެލްސީގެ ސަޕޯޓަރުންގެ މެދުގައި ކުރު މުއްދަތެއްގެ ތެރޭގައި މަގުބޫލުކަން ހޯދި ޓުޗެލްގެ މަގާމު ފޫބެއްދުމަކީ ޕޮޓާ އަށް އޮތް ޗެލެންޖެއްގެ ގޮތުގައި މީޑިއާ އިން ސިފަކުރާއިރު، އެ ކަމަށް ކުރިމަތިލާން އޭނާ އަށް އޮތް ހިތްހަމަޖެހުމަކީ ބޯލީގެ އިތުބާރު އޭނާ އަށް އޮތުމެވެ.
