އިނގިރޭސިވިލާތުގެ ރަސްކަމާ ދެކޮޅަށް ހިޔާލު ފާޅުކުރާ މީހުން ހައްޔަރު ކުރާތީ އެކްޓިވިސްޓުން ކަންބޮޑުވުން ފާޅުކޮށްފި އެވެ.
ސްކޮޓްލޭންޑްގެ ފުލުހުން ވަނީ ދެ މީހުން ހައްޔަރުކޮށް ދައުވާ އުފުލައިފަ އެވެ. އޮކްސްފޯޑުން ވެސް މީހަކު ހައްޔަރު ކުރުމަށް ފަހު ދޫކޮށްލި އެވެ.
އެ މީހުން ހައްޔަރު ކުރީ ރާނީ އެލިޒަބަތު ދެ ވަަނަ އަވަހާރަވުމާާއި އާ ރަސްގެފާނު ޗާލްސް ތިން ވަނައާ ތަހުތު ހަވާލުކުރެއްވުމުން ބޭއްވި ހަރަކާތްތަކުގެ ތެރެއިންނެވެ.
އެކްޓިވިސްޓުން ކަންބޮޑުވުން ފާޅުކޮށް ބުނީ ހިޔާލު ފާޅު ކުރުމަކީ ދައުލަތުން ރައްޔިތުންނަށް ދޭ ހަދިޔާއެއް ނޫން ކަމަށާއި އެއީ ކޮންމެ މީހެއްގެ ވެސް އަސާސީ ހައްގެއް ކަމަަށެވެ.
ލަންޑަންގައި ރާނީގެ ސަންދޯއް ބަލަން މީހުން ސަަފު ހަދަން ފަށާފައިވާ އިރު، ފުލުހުން ބުނީ ހިޔާލު ފާޅުކޮށް މުޒާހަރާ ކުރުމުގެ ހައްގު ރައްޔިތުންނަށް އޮންނާނެ ކަމަށެވެ.
އިނގިރޭސި ބޮޑު ވަަޒީރުގެ އޮފީހުން ބުނީ މިއީ ގައުމީ ހިތާމައިގެ ވަގުތެއް ނަމަަވެސް، ހިޔާލު ފާޅު ކުރުމުގެ މިނިވަންކަމަކީ އިނގިރޭސި ޑިމޮކްރަސީގެ އެއް ތަނބު ކަމަށެވެ.
