ފަލަސްތީނަށް ތާއީދުކުރާ ދަރިވަރުންނާއި އެކަޑެމިކް ބޭފުޅުންނަށް ފާރަލުމަށް އިނގިރޭސިވިލާތުގެ އެންމެ ނުފޫޒުގަދަ 12 ޔުނިވަސިޓީއަކުން އަމިއްލަ ސެކިއުރިޓީ ކުންފުންޏަކަށް ބޮޑެތި އަދަދުތަކުން ފައިސާ ދީފައިވާކަން އަލްޖަޒީރާ އާއި ލިބަޓީ އިންވެސްޓިގޭޓްސް އިން ކުރި ތަހުގީގަކުން ހާމަވެއްޖެއެވެ.
މި މަސައްކަތަށް "ހޯރަސް ސެކިއުރިޓީ ކޮންސަލްޓަންސީ ލިމިޓެޑް" ނަމަކަށް ކިޔާ ކުންފުންޏަކަށް 2022 އިން ފެށިގެން މަދުވެގެން 440،000 އިނގިރޭސި ޕައުންޑް ޔުނިވަސިޓީތަކުން ވަނީ ދައްކާފައެވެ.
މި ތަހުގީގުން ހާމަވި ގޮތުގައި، އިނގިރޭސި އަސްކަރީ ޖާސޫސީ އިދާރާގެ ކުރީގެ އިސްވެރިން ހިންގާ މި ކުންފުނިން ދަނީ ދަރިވަރުންގެ ސޯޝަލް މީޑިއާ އެކައުންޓްތައް ބަލައި، އިހުތިޖާޖުތަކާ ގުޅޭ މައުލޫމާތު އެއްކޮށް، ޓެރަރިޒަމާ ގުޅުންހުރި ނުރައްކަލެއް އޮތްތޯ ބެލުމުގެ ނަމުގައި ސިއްރު ރިޕޯޓުތައް ތައްޔާރުކުރަމުންނެވެ.
ފާރަލުމުގެ މި ހަރަކާތްތަކުގައި ބައިވެރިވި ޔުނިވަސިޓީތަކުގެ ތެރޭގައި އޮކްސްފޯޑް، އިމްޕީރިއަލް ކޮލެޖް ލަންޑަން، ޔޫސީއެލް، ކިންގްސް ކޮލެޖް ލަންޑަން އަދި ބްރިސްޓަލް ޔުނިވަސިޓީ ފަދަ މަޝްހޫރު މުއައްސަސާތައް ހިމެނެއެވެ. ބްރިސްޓަލް ޔުނިވަސިޓީން ވަނީ ފަލަސްތީނަށް ތާއީދުކުރާ ގްރޫޕްތަކާއި ޖަނަވާރުންގެ ހައްގުތަކަށް މަސައްކަތްކުރާ ޖަމިއްޔާތަކުގެ މައުލޫމާތު ހޯދުމަށް އެ ކުންފުންޏަށް ހާއްސަ ލިސްޓެއްވެސް ދީފައެވެ.
ހޯރަސްގެ އިސްވެރިއެއް ކަމަށްވާ ކާނަލް ޓިމް ކޮލިންސް ވަނީ ހުޅަނގުގެ ގައުމުތަކުގައި ފަލަސްތީނަށް ތާއީދުކޮށް ބާއްވާ މުޒާހަރާތަކަކީ ރަޝިޔާ އާއި އިރާނުން އަޑީގައި ތިބެގެން ހިންގާ ކަމެއްގެ ގޮތުގައި ސިފަކުރައްވާފައެވެ.
މި މައްސަލައާ ގުޅިގެން އދ. ގެ ހާއްސަ ރެޕަޓުއަ ގީނާ ރޮމޭރޯ ވިދާޅުވީ، އާޓިފިޝަލް އިންޓެލިޖެންސް ބޭނުންކޮށްގެން ދަރިވަރުންގެ މައުލޫމާތު އެއްކުރުމަކީ ގާނޫނީ ގޮތުން ކަންބޮޑުވާންޖެހޭ ކަމެއް ކަމަށެވެ. މިފަދަ ފާރަލުންތަކުގެ ސަބަބުން ދަރިވަރުންގެ މެދުގައި ބިރުވެރިކަން އުފެދި، އެކުދިންގެ ނަފްސާނީ ދުޅަހެޔޮކަމަށް އަސަރުކުރަމުންދާ ކަމަށްވެސް އޭނާ ފާހަގަކުރެއްވިއެވެ.
ޔުނިވަސިޓީތަކުން މި ތުހުމަތުތަކުގެ ދިފާއުގައި ބުނެފައިވަނީ، ބޭރުގެ ކުންފުނިތަކުގެ އެހީތެރިކަން ހޯދަނީ ކެމްޕަހުގެ ސަލާމަތާއި ރައްކާތެރިކަން ކަށަވަރުކުރުމަށާއި، އާންމުކޮށް ފެންނަން ހުރި މައުލޫމާތުތައް ދިރާސާކުރުމަށް ކަމަށެވެ. ނަމަވެސް އިނގިރޭސިވިލާތުގެ ލެކްޗަރާއިންގެ ޔޫނިއަނުން ވަނީ ދަރިވަރުންނަށް ފާރަލުމަށް މިހާ ބޮޑު ހޭދައެއް ކުރުމަކީ ލަދުވެތި ކަމެއްގެ ގޮތުގައި ސިފަކޮށްފައެވެ.
ހޯރަސް ކުންފުނިން މި މައްސަލާގައި އަދި އެއްވެސް ރަސްމީ ބަހެއް ބުނެފައެއް ނުވެއެވެ.
