ތައިލޭންޑްގެ ރާނީ ގޮތަށް ހެދުން އަޅައިގެން މުޒާހަރާ ކުރި އެކްޓިވިސްޓަކު އެ ގައުމުގެ ރަސްކަމަށް އިހްތިރާމް ކުޑަކުރިކަމަށް ސާބިތުވެ، ދެ އަހަރަށް ޖަލަށް ހުކުމްކޮށްފި އެވެ.
އުމުރުން 25 އަހަރުގެ ޖަޓުޕޯން ސައެއުއެންގް ފިޔާތޮށި ކުލައިގެ ހެދުމެއް ލައިގެން މުޒާހަރާ ކުރީ ބެންކޮކްގައި 2020 ވަނަ އަހަރު އެވެ. އޭނާ ކޯޓުގައި ދައުވާއަށް އިންކާރުކޮށް ބުނީ ލައިގެން ހުރީ ސަގާފީ ހެދުމެއް ކަމަށެވެ.
އެހެން ނަމަވެސް ތައިލޭންޑްގެ ހަރުކަށި ގާނޫނުތަކުގެ ދަށުން އެ ގައުމުގެ ރަސްގެފާނާއި އެހެން ޝާހީ ބޭފުޅުންނަށް ފާޑުކިޔުން މަނާކޮށްފައިވެ އެވެ.
ބާރުގަދަ ރަސްކަމަށް އިސްލާހީ ބަދަލު ގެންނަން އެކްޓިވިސްޓުން ޑިމާންޑް ކުރި ނަމަވެސް، 2019 ވަނަ އަހަަރު ތަހުތާ ހަވާލުވެވަޑައިގެންނެވި ރަސްގެފާނު ވަޖިރަލްއޮންގްކޯން އެކަމާ ދެކޮޅެވެ.
ނޮވެމްބަަރު 2020 އިން ފެށިގެން ރަސްކަމަށް އިހްތިރާމް ކުޑަކުރިކަމަށް ބުނެ 210 އަށް ވުރެ ގިނަ މީހުންނާ ދެކޮޅަށް ދައުވާކޮށްފައިވެ އެވެ.
