ސްރީލަންކާއަށް ގެންނަންވީ އިސްލާހީ ބަދަލުތަކާއި ވެރިކަން ކުރުމުގެ ނިޒާމާ މެދު ސިޔާސީ ޕާޓީތަކަށް ގޮތެއް ނުނިންމޭ ނަމަ ރައްޔިތުންގެ ފެންނަ ނުފެންނަ ވޯޓަކަށް ދާނެ ކަމަށް ރައީސް ރަނިލް ވިކްރަމަސިންހަ ވިދާޅުވެއްޖެ އެވެ.
ރަނިލް ވިދާޅުވީ އިސްލާހީ ބަދަލުތަކާއި ވެރިކަން ކުރުމުގެ ނިޒާމާ މެދު ސިޔާސީ ޕާޓީތަކުގެ މެދުގައި ދެބަސްވުން އެބަ އޮތް ކަމަށެވެ. މަޝްވަރާއަށް ފަހު ހަ މަސް ތެރޭގައި ގޮތެއް ނުނިންމޭ ނަމަ އާއްމުންގެ ވޯޓެއް ނަގާނެ ކަމަށް އެމަނިކުފާނު ވިދާޅުވި އެވެ.
"އަޅުގަނޑު މި ދެނީ ހަ މަސް. ގޮތެއް ނުނިންމައިފި ނަމަ، ފެންނަ ނުފެންނަ ވޯޓަކަށް ގޮސް ރައްޔިތުން ބޭނުންވަނީ ކޮން ނިޒާމެއްތޯ ބަލާނަން،" ރަނިލް ވިދާޅުވި އެވެ.
ރަނިލް އެގޮތަށް ވިދާޅުވީ މި ވަގުތު ސްރީލަންކާގައި ހުންނެވީ ޔޫއެސްއެއިޑްގެ އެޑްމިނިސްޓްރޭޓަރު ސަމަންތާ ޕަވާއާ ބައްދަލުކުރެއްވުމަށް ފަހުގަ އެވެ.
ސަމަންތާ ވިދާޅުވީ ސްރީލަަންކާގެ ދަަރަނި ރީސްޓްރަކްޗާ ކުރުމުގައި އެމެރިކާގެ އެއްބާރުލުން ލިބޭނެ ކަމަށާއި ޗައިނާ އާއި ލަންކާއަށް ދަރަންޏަށް ފައިސާ ދީފައިވާ ހުރިހާ ގައުމަކުން ވެސް އެއްބާާރުލުން ދިނުން މުހިއްމު ކަމަށެވެ.
