ޕެރިސް (ސެޕްޓެމްބަރު 11) - ފްރެންޗް ލީގުގައި ރޭ ނޭމާ ޖެހި ގޯލުން 1-0 އިން ބްރެސްޓް ބަލިކޮށް ޕީއެސްޖީ އެއް ވަނައިގައި އޮތްއިރު، ލިލްގެ މައްޗަށް 2-1 އިން ކުރިހޯދައި މާސޭ އިން ދެ ވަނަ މަގާމުގައި ހަމަޖެހުމެއް ހޯދައިފި އެވެ.
ކްރިސްޓޮފް ގަލްޓިއޭ ކޯޗުކޮށްދޭ ޕީއެސްޖީ އެއް ވަނައިގައި އޮތީ ހަތް މެޗުން 19 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް ވެސް ވަނީ ހަތް މެޗުން 19 ޕޮއިންޓް ލިބިފަ އެވެ. ތިން ވަނައިގައި އޮތް ލެންސަށް ވަނީ ހަތް މެޗުން 17 ޕޮއިންޓް ލިބިފަ އެވެ.
ބްރެސްޓް ދަނޑުގައި ރޭ ކުޅުނު މެޗުގެ 10 ވަނަ މިނިޓްގައި ނޭމާ އަށް ގޯލު ޖަހަން ލިބުނު ފުރުސަތުގައި އޭނާ ޖެހި ބޯޅަ އަމާޒުވީ ގޯލުގެ އަރިމަތީ ދާގަނޑަށެވެ. އެކަމަކު، މެޗުގެ 30 ވަަނަ މިނިޓްގައި ލިއޮނަލް މެސީ ހުސްކޮށްލާފައި މަތިން ދިން ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު ނޭމާ ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. މިއީ މި ސީޒަނުގައި ރަނގަޅު ފޯމެއްގައި ހުރި ނޭމާ ޖެހި 10 ވަނަ ގޯލެވެ.
މެޗުގެ 50 ވަަނަ މިނިޓްގައި މެސީ ވަނީ ޕީއެސްޖީ އަށް ދެ ވަނަ ގޯލެއް ޖަހައިދިނުމާ ގާތަށް ޖެހިލައިފަ އެެވެ. ކީލިއަން އެމްބާޕޭ ނެގި ހުރަހަކުން އޭރިއާތެރެއިން މެސީ ބޮލުން ޖެހި ބޯޅަ އަމާޒުވީ ގޯލުގެ އަރިމަތީ ދަނޑިއަށެެވެ. އޭގެ ހަތް މިނިޓް ފަހުން، އޭރިއާތެރެއަށް ބޯޅަ ހިފައިގެން ވަދެ، އެމްބާޕޭ ޖެހި ބޯޅަ ދިޔައީ އަރިމަތިން ބޭރުންނެވެ.
ބްރެސްޓަށް އެއްވަރުކޮށްދޭން މެޗުގެ 70 ވަނަ މިނިޓްގައި އެ ޓީމުގެ އަލްޖީރިއާ ފޯވާޑް އިސްލާމް ސްލިމާނީ އަށް ރަނުގެ ފުރުސަތެއް ލިބުނެވެ. އެކަމަކު، އޭނާ ޖެހި ޕެނަލްޓީ ޕީއެސްޖީގެ ކީޕަރު ޖިއަންލުއީޖީ ޑޮންނަރުންމާ ވަނީ މަތަކޮށްފަ އެވެ.
މާސޭ ދަނޑުގައި ރޭ 11 ވަނަ މިނިޓްގައި ލިލްގެ އިސްމައިލީ އޭރިއާތެރެއިން ރީބައުންސް ބޯޅައެއްގައި ވަނީ އެ ޓީމަށް ގޯލެއް ޖަހައިދީފަ އެވެ.
ލިލް އިން މެޗުގެ ކުރީކޮޅުގައި ލީޑުނެގި ނަމަވެސް މާސޭ އިން ވަނީ މެޗުގެ ނަތީޖާ އަނބުރާލައިފަ އެވެ. މެޗުގެ 26 ވަނަ މިނިޓްގައި މާސޭ އަށް އެއްވަރުކޮށްދިނީ ކައުންޓަ އެޓޭކެއްގައި އަލެކްސިސް ސަންޗޭޒް އެވެ. މިއީ އޭރިއާތެރެއިން ޗެންގިޒް އުންޑެއާ ދިން ބޯޅައަކުން ޖެހި ގޯލެކެވެ.
މެޗުގެ ތިން ޕޮއިންޓް މާސޭ އަށް ކަށަވަރުކޮށްދިން ގޯލު ޖެހީ ދެ ވަނަ ހާފުގައި ސެމުއެލް ގިގޮޓް އެވެ. މެޗުގެ 61 ވަަނަ މިނިޓްގައި ހިލޭ ޖެހުމަކުން އޭރިއާތެރެއަށް އައި ބޯޅައެއް ގިގޮޓް ވަނީ ގޯލުގެ ކަނަށް ފޮނުވާލައިފަ އެެވެ.
