މިލާން (ސެޕްޓެމްބަރު 11) - އިޓާލިއަން ލީގުގައި ރޭ އިންޓަ މިލާނާއި އޭސީ މިލާން ކުޅުނު މެޗުތަކުން އުނދަގޫ މޮޅެއް ހޯދިއިރު، ފަހު ވަގުތު ޖެހި ގޯލުން މޮޅުވެ، ނަޕޯލީން ލީގުގެ އެއް ވަނަ އަށް ޖެހިލައިފި އެވެ.
މިލާނުގެ ރަފައެލް ލެއާއޯ އަށް ރަތް ކާޑު ދެއްކި މެޗުގައި ރޭ އެ ޓީމުން ސަމްޑޯރިއާ އަތުން މޮޅުވީ 2-1 އިންނެވެ. އިންޓަ އިން 1-0 އިން ޓޮރިނޯ ބަލިކުރިއިރު، ސްޕެޒިއާގެ މައްޗަށް ނަޕޯލީން 1-0 އިން ކުރިހޯދައިފި އެވެ.
މި ނަތީޖާތަކަށް ފަހު ނަޕޯލީ އެއް ވަނައިގައި އޮތީ ދެ ވަނައިގައި އޮތް އެންމެ ފަހުގެ ޗެމްޕިއަން، މިލާނާ އެއްވަރަށް ހަ މެޗުން 14 ޕޮއިންޓާ ހޯދައިގެންނެވެ. ތިން ވަނައިގައި އޮތީ ފަސް މެޗުން 13 ޕޮއިންޓް ހޯދާފައިވާ އެޓަލަންޓާ އެވެ. ރޭގެ މޮޅާ އެކު އިންޓަ ހަތަރެއްގައި އޮތީ ފަސް މެޗުން 12 ޕޮއިންޓް ހޯދައިގެންނެވެ.
ސަމްޑޯރިއާ ދަނޑުގައި ރޭގެ މެޗުގެ ހަ ވަނަ މިނިޓްގައި ލެއާއޯ ދިން ބޯޅައަކުން މިލާނަށް ލީޑުނަގައިދިނީ އޭރިއާތެރެއިން ޖޫނިއާ މެސިއަސް އެވެ. މެޗުގެ 41 ވަނަ މިނިޓްގައި މިލާންގެ އޮލިވިއޭ ޖިރޫޑް ޖެހި ބޯޅައެއް ސަމްޑޯރިއާގެ ކީޕަރު އެމީލް އައުޑޭރޯ ވަނީ މަތަކޮށްފަ އެވެ. މެޗުގެ 47 ވަނަ މިނިޓްގައި ލެއާއޯ އަށް ދެ ވަނަ ރީނދޫ ކާޑަކާ އެކު ރަތް ކާޑެއް ދެއްކީ އޯވަހެޑް ކިކެއް ޖަހަން އެރި ވަގުތު އޭނާގެ ފައިން ސަމްޑޯރިއާގެ ކުޅުންތެރިއަކު މޫނުގައި ޖެހުމުންނެވެ.
ކުޅުންތެރިއަކު މަދުކޮށް މިލާނުން ކުޅުމުގެ ފައިދާނަގައި، މެޗުގެ 57 ވަަނަ މިނިޓްގައި ސަމްޑޯރިއާގެ ފިލިޕް ޖުރިޗިޗް ބޮލުން ގޯލެއް ޖަހައި އެ ޓީމަށް އެއްވަރުކޮށްދިނެވެ. މެޗުގެ 66 ވަަނަ މިނިޓްގައި ޕެނަލްޓީ އަކުން މިލާނަށް ދެ ވަނަ ފަހަރަށް ލީޑުނަގައިދިނީ ޖިރޫޑް އެވެ. މިއީ ޖިރޫޑް ބޮލުން ޖެހި ބޯޅައެއް ސަމްޑޯރިއާ ކުޅުންތެރިއަކު އަތުގައި ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ.
ސަމްޑޯރިއާގެ ކުޅުންތެރިއަކަށް ވެސް މެޗުގެ އިތުރު ވަގުތުގައި ވަނީ ރަތް ކާޑެއް ދައްކައިފަ އެވެ.
ޓޮރިނޯ ކޮޅަށް ގޯލެއް ޖަހަން އިންޓަ އިން ކުރި މަސައްކަތް ކާމިޔާބުވީ މެޗު ނިމެން ދެ މިނިޓަށް ވެފައި ވަނިކޮށެވެ. އިންޓަގެ މިޑްފީލްޑަރު، ނިކޯލޯ ބަރޭލާ އޭރިއާތެރެއަށް ހުރަސްކޮށްލި ބޯޅަ ގޯލަށް ވައްދާލީ އެ ޓީމުގެ ކްރޮއޭޝިއާ މިޑްފީލްޑަރު މާސެލޯ ބްރޮޒޮވިޗް އެވެ.
ފަހު ވަގުތު ނަޕޯލީ މޮޅުކޮށްދިން ގޯލު ޖެހީ ޖިއަކޯމޯ ރަސްޕަޑޯރީ އެވެ. މިއީ މެޗުގެ 89 ވަނަ މިނިޓްގައި ހާވިން ލޮޒާނޯ ނެގި ހުރަހަކުން އޭރިއާތެރެއިން ޖިއަންލޫކާ ގައެޓާނޯ ޖަހަން މަސައްކަތް ކުރި ބޯޅަ އޭނާ ފައިގައި ޖެހިފައި ގޮސް، ރަސްޕަޑޯރީ އަށް ލިބުމުން އޭނާ ގޯލުގެ ތިރީ ކަނަށް ބޯޅަ ފޮނުވާލައިގެން ޖެހި ގޯލެކެވެ.
ރަސްޕަޑޯރީ މި މެޗުގައި ކުޅުވީ އެ ޓީމުގެ ނައިޖީރިއާ ފޯވާޑް، ވިކްޓަ އޮސީމެއިން އަށް އަނިޔާވުމުންނެވެ. އޮސީމެއިން އަށް އަނިޔާވީ ޗެމްޕިއަންސް ލީގުގައި ނަޕޯލީން ލިވަޕޫލް ބަލިކުރި މެޗުގަ އެވެ.
ނަޕޯލީގެ މެޗުގައި ހިނގާދިޔަ ހަމަނުޖެހުންތަކަކާ ހެދި އެ ޓީމުގެ ކޯޗު ލޫޗިއާނޯ ސްޕަލެއްޓީ އަށް ވަނީ ދެ ވަނަ ރީނދޫ ކާޑާ އެކު ރަތެއް ދައްކައި ބެންޗުން ފޮނުވާލައިފަ އެވެ.
