އަަފްގާނިސްތާނުގެ އިރުމަތީ ސިޓީއެއްގައި ސެކަންޑްރީ ސްކޫލްތައް ހުޅުވިތާ މާ ގިނަ ދުވަސްތަކެއް ނުވެ އަލުން ބަންދު ކުރުމުން އަންހެން ދަރިވަރުން މުޒާހަރާކޮށްފި އެވެ.
އިރުމަތީ ޕަކްތިއާ ޕްރޮވިންސްގައި ސަރުކާރުން ހިންގާ ފަސް ސެކަންޑްރީ ސްކޫލް ހުޅުވީ މިދިޔަ ހަފުތާގަ އެވެ. އެހެން ނަމަވެސް، ހޮނިހިރު ދުވަހު އަލުން ސްކޫލްތައް ބަންދު ކުރި އެވެ.
ހޮނިހިރު ދުވަހު ސްކޫލަށް ދިޔުމުން އަނބުރާ ގެޔަަށް ދާން އެންގުމާ އެކު ދަރިވަރުން ވަނީ ސްކޫލް ޔުނިފޯމުގައި ތިބެ އަޑުއުފުލައި، ގަރްދޭޒް ސިޓީގައި ހިނގާލައިފަ އެވެ.
ހުޅުވުމަށް ފަހު ބަންދު ކުރި ފަސް ސްކޫލްގެ ތެރެއިން ހަތަރު ސްކޫލް ހުންނަނީ ގަރްދޭޒްގަަ އެވެ. ފަސް ވަނަ ސްކޫލް ހުންނަނީ ސަމްކާނީގަ އެވެ.
މިދިޔަ އަހަރުގެ އޯގަސްޓް މަހު ވެރިކަމަށް އައި ތާލިބާނުން ވަނީ އަންހެން ދަރިވަރުންގެ ސްކޫލްތައް ބަންދުކޮށް، އަންހެން ކުދިންނާއި އަންހެނުންގެ އާއްމު ދިރިއުޅުން ހުއްޓުވައިފަ އެވެ.
ތާލިބާނުންގެ އޮފިޝަލުން ބުނީ ސްކޫލްތައް ބަންދު ކުރީ ޓެކްނިކަލް މައްސަލައަކާ ހެދި ކަމަށާއި އިސްލާމީ އުސޫލުތަކާ އެއް ގޮތް އާ ކަރިކިއުލަމެއް ހެދުމުން ސްކޫލްތައް ހުޅުވާނެ ކަމަށެވެ.
ޔުނިސެފުން ބުނާ ގޮތުން ތާލިބާނުން ވެރިކަަމަށް އައި ފަހުން އަފްގާނިސްތާނުގެ ތިން މިލިއަން އަންހެން ކުދިން ވަނީ ތައުލީމުން މަހުރޫމްކޮށްފަ އެވެ.
