ނިއު ޔޯކްގައި ޕޯލިއޯ ވައިރަސް ފެތުރޭކަމުގެ ހެކި ލިބިފައި ވާތީ އެ ސްޓޭޓުގެ ގަވަރުނަރު ކުއްލި ނުރައްކަލުގެ ހާލަތު އިއުލާންކޮށްފި އެވެ.
ސިއްހީ އޮފިޝަލުން ބުނީ ނިއު ޔޯކް ސިޓީ އާއި އިތުރު ހަތަރު ކައުންޓީގެ ނަޖިސް ފެނުގެ ސާމްޕަލް ޓެސްޓު ކުރި އިރު، ވާގިނެތުމަށް މަގުފަހިވާ ޕޯލިއޯ ވައިރަހަށް ޕޮޒިޓިވް ކަމަށެވެ.
މިހާތަނަށް ފެނުނީ ބަލި ޖެހިފައި މީހެއްގެ އެންމެ ކޭސްއެއް ނަމަވެސް، މިއީ އެމެރިކާގައި 10 އަހަރުގެ ތެރޭގައި ފެނުނު ޕޯލިއޯގެ ފުރަތަމަ ކޭސް އެވެ.
އެމެރިކާގައި 1955 ވަނަ އަހަރު ވެކްސިން ޕްރޮގްރާމާ އެކު، ޕޯލިއޯ ކޭސްތައް މަދުވި އެވެ. އެމެރިކާއިން ޕޯލިއޯ ނައްތާލެވިފައިވާކަން އިއުލާން ކުރީ 1979 ގަ އެވެ.
އެހެން ނަމަވެސް ނިއު ޔޯކްގެ އޮފިޝަލުން ބުނީ އެ ސްޓޭޓުގެ ބައެއް ހިސާބުތަކުގައި ވެކްސިން ޖަހާފައިވާ ރޭޓް ވަރަށް ދަަށް ކަމަށެވެ. ކުއްލި ނުރައްކަލުގެ ހާލަތު އިއުލާން ކުރީ ވެކްސިން ޖެހުން އިތުރު ކުރުމަށެވެ.
ޕޯލިއޯއަށް ފަރުވާއެއް ނެތް ނަމަވެސް، ވެކްސިން ޖަހައިގެން އެ ބަލިން ރައްކާތެރިކަން ހޯދެ އެވެ. އާއްމުކޮށް ކުޑަކުދިންނަށް ޖެހޭ ޕޯލިއޯ ވައިރަހުން މަސްތައް ބަލިކަށިކޮށްލައި، ވާގިނެތެން މަގުފަހިވެ އެވެ. ސީރިއަސް ކޭސްތަކުގައި ދާއިމަށް ނުކުޅެދުންތެރިކަމާ ކުރިމަތިވެ، މަރު ވެސް ވެ އެވެ.
ނިއު ޔޯކްގެ ވެކްސިން ރޭޓް މިހާރު އުޅެނީ އެވްރެޖުކޮށް 79 ޕަސެންޓުގައި އެވެ. އެ ސްޓޭޓުގެ ހެލްތު ޑިޕާޓްމަންޓުގެ އަމާޒަކީ ވެކްސިން ރޭޓް 90 ޕަސެންޓަށް ވުރެ މަތި ކުރުމެވެ.
