އުތުރު ކޮރެއާއަކީ ނިޔުކްލިއާ ހަތިޔާާރު ހުރި ދައުލަތެއް ކަމަށް ކަނޑައަޅައި އެ ގައުމުން ގާނޫނެއް ފާސްކޮށްފައިވާ ކަމަށް ދައުލަތުގެ ނިއުސް އެޖެންސީ ކޭސީއެންއޭއިން ބުނެފި އެވެ.
ލީޑަރު ކިމް ޖޮންގް އުން ވިދާާޅުވީ އެއީ "ބަދަލު ނުކުރެވޭނެ" ނިންމުމެއް ކަމަށާއި ނިޔުކްލިއާ ހަތިޔާރު ނައްތާލުމާ ގުޅޭ އެއްވެސް މަޝްވަރާއެއް ނުކުރެވޭނެ ކަމަށެވެ.
ފާސްކުރި ގާނޫނުގެ ދަށުން، އުތުރު ކޮރެއާއަށް ނުރައްކަލެއް އޮތް ނަމަ، އެހެން ގައުމަކާ ދެކޮޅަށް ނިޔުކްލިއާ ހަތިޔާރު ބޭނުން ކުރުމުގެ ހައްގު ލިބޭނެ އެވެ.
ދަތިކުރުމުގެ ފިޔަވަޅުތައް އަޅާފައި ހުރި ނަމަވެސް އުތުރު ކޮރެއާއިން ވަަނީ 2006 އިން 2017 އާ ދެމެދު ހަ ނިޔުކްލިއާ ޓެސްޓު ކޮށްފަ އެވެ.
އދ. ގެ ސަލާމަތީ މަޖިލީހުގެ ގަރާރުތަކަށް ވެސް ބެލުމެއް ނެތި، އުތުރު ކޮރެއާއިން ދަނީ އަސްކަރީ ގާބިލްކަން އިތުރު ކުރަމުންނެވެ.
އެމެރިކާއިން ބުނެފައި ވަނީ އަމާޒަކީ ކޮރެއާ ހިމެނޭ ޕެނިންސުލާއިން ނިޔުކްލިއާ ހަތިޔާރު ނައްތާލުން ކަމަށާއި މަޝްވަރާއަށް ތައްޔާރު ކަމަށެވެ. އެކަމަކު އުތުރު ކޮރެއާއިން ދައުވަތަށް އިޖާބައެއް ނުދެ އެވެ.
މި އަހަރުގެ އުތުރު ކޮރެއާއިން ގިނަ އަދަދެއްގެ ބެލިސްޓިކް މިސައިލް ޓެސްޓު ކުރުމުން ކޮރެއާ ޕެނިންސުލާގައި ނުތަނަވަސްތަކަން އިތުރުވި އެވެ.
ރަައްދުގައި ދެކުނު ކޮރެއާ އާއި އެމެރިކާއިން ވަނީ ގިނަ އަަދަދެއްގެ އަސްކަރީ ތަމްރީން ހިންގާފަ އެވެ.
