ލަންޑަން (ސެޕްޓެމްބަރު 8) - ހުސްވެފައިވާ ޗެލްސީގެ ކޯޗުގެ މަގާމަށް ބްރައިޓަން ހޯލްވް އެންޑް އަލްބިއަންގައި ހުރި އިނގިރޭސި ކޯޗު ގްރަަހަމް ޕޮޓާ ހަމަޖައްސައިފި އެވެ.
ޗެލްސީގެ ކޯޗުގެ ވަޒީފާ ހުސްވީ މިދިޔަ އަންގާރަ ދުވަހުގެރޭ ޗެމްޕިއަންސް ލީގުގައި ކްރޮއޭޝިއާގެ ޑިނަމޯ ޒަގްރެބް އަތުން 1-0 އިން ޗެލްސީ ބަލިިވިތާ މާގިނައިރެއްނުވެ، އޭރު ޗެލްސީގެ ކޯޗަކަށް ހުރި ޖަރުމަނުގެ ކޯޗު ތޯމަސް ޓުޗެލް ވަކިކުރުމުންނެވެ.
އިނގިރޭސި 21 އަހަރުން ދަށުގެ ގައުމީ ޓީމަށް ކުރިން ކުޅުނު ޕޮޓާ، ޗެލްސީގެ ކޯޗުކަމާ ހަވާލުވީ ފަސް އަހަރުގެ ކޮންޓްރެކްޓެއްގަ އެވެ. އޭނާ ކުރިން ހަވާލުވެ ހުރި ބްރައިޓަން ޓީމުގެ ކޮންޓްރެކްޓް ގަންނަން ޗެލްސީން ވަނީ 18 މިލިއަން ޑޮލަރުގެ ފީއެއް ދައްކަން އެއްބަސްވެފަ އެވެ.
ޕޮޓާ، 47، ބުނީ ޗެލްސީ ކަހަލަ ބޮޑު ކްލަބެއްގެ ކޯޗުކަން ކުރަން ލިބުނު ފުރުސަތުގެ ބޭނުންވީ އެންމެ ރަނގަޅަށް ހިފަން ބޭނުންވާ ކަމަށެވެ.
"އަހަރެން ބޭނުން ޗެލްސީގެ ހުށަހެޅުން ގަބޫލުކޮށް އެ ޓީމާ ހަވާލުވާން ބްރައިޓަން އިން ފުރުސަތު ތަނަވަސްކޮށްދިނީމަ، ޗެލްސީގައި މި ތިބި ހުނަރުވެރި މޮޅު ކުޅުންތެރިންނާ އެކު ރަނގަޅު މަސައްކަތްތަކެއް ކޮށްގެން ކާމިޔާބު ހޯދަން އަހަރެން ބޭނުން،" 2011 ވަނަ އަހަރު ސްވިޑެންގެ އޮސްޓަސަންޑް އިން ކޯޗިން ކެރިއަރު ފެށި ޕޮޓާ ބުންޏެވެ.
ޗެލްސީގެ ކޯޗުކަމުން ޓުޗެލް ވަކިކުރަން، އެ ކްލަބްގެ ސީނިއާ މެނޭޖްމަންޓުން ނިންމީ މި ސީޒަން ފެށިއިރު، ޓްރާންސްފާ މާކެޓްގައި 291 މިލިއަން ޑޮލަރު ހަރަދުުކުރުމަށް ފަހު ވެސް ބޭނުންވާ ނަތީޖާތައް ނުނެރެވޭތީ އެވެ.
ޗެލްސީގެ ވެރިޔާ، އެމެރިކާގެ މަހުޖަނު ޓޮޑް ބޯލީ، އެ ކްލަބާ ހަވާލުވިތާ ކުރު މުއްދަތެއްގެ ތެރޭގައި ބޮޑު ހަރަދެއް ޓްރާންސްފާ މާކެޓްގައި ކުރުމަށް ފަހު މި ވަނީ އާ ސީޒަނުގެ ފުރަތަމަ ހަތް މެޗަށް ފަހު ކޯޗު ބަދަލުކޮށްފަ އެވެ.
ބޯލީ ބުނީ ޕޮޓާ ގެންނަން ނިންމި އެންމެ ބޮޑު ސަބަބަކީ ޕްރިމިއާ ލީގުގައި ބްރައިޓަން ގޮވައިގެން އޭނާ ކުރަމުން އަންނަ މަސައްކަތް ރަނގަޅުވުން ކަމަށެވެ. އަދި ޗެލްސީގައި މިހާރު އޮތް މެނޭޖްމަންޓުން ބޭނުންވާ މިސްރާބަށް ކްލަބް ގެންދަން ޕޮޓާ އަށް ބޮޑު ރޯލެއް ކުޅެދެވޭނެ ކަމުގެ ޔަގީންކަން އެބައޮތް ކަމަށް ބޯލީ ވަނީ ބުނެފަ އެވެ.
"ޗެލްސީ ކާމިޔާބު ކްލަބެއްގެ ގޮތުގައި ކުރިއަށްގެންދަން ގްރަހަމް (ޕޮޓާ) އަކީ ރަނގަޅު ކޯޗެއް،" ބޯލީ ބުންޏެވެ.
ކުރިން ސްވަންސީ ސިޓީ އާއި ބްރައިޓަން އަށް ކޯޗުކޮށްދިން ޕޮޓާ، ޗެލްސީ ގޮވައިގެން ނުކުންނަ ފުރަތަމަ މެޗަކަށް ވާނީ އަންނަ ހޮނިހިރު ދުވަހު ފުލަމްއާ ދެކޮޅަށް ކުޅޭ މެޗެވެ.
