އޮސްޓްރޭލިއާއިން ޖައްވަށް ބޭރު ކުރާ ވިހަ ގޭސް މަދު ކުރަން ފުރަތަމަ ފަހަރަށް ލަނޑުދަނޑިއެއް ކަނޑައަޅައި ޕާލިމެންޓުން ގާނޫނު ފާސްކޮށްފި އެވެ.
އޮސްޓްރޭލިއާގެ ލަނޑުދަނޑިއަކީ 2030 ގެ ކުރިން ކާބަން ބޭރު ކުރާ މިންވަަރު 43 ޕަސެންޓް މަދު ކުރުމެވެ. އެންމެ ގިނައިން ވިހަ ގޭސް ބޭރު ކުރާ އެއް ގައުމަކީ އޮސްޓްރޭލިއާ އެވެ.
އެ ގައުމުން ކަނޑައެޅި ލަނޑުދަނޑިއަކީ ތަރައްގީވެފައިވާ އެހެން ގައުމުތަކާ އެއްވަރުގެ ލަނޑުދަނޑިއެކެވެ. އެކަމަކު ޓާގެޓަށް ވާސިލްވުމަށް އެކަށީގެންވާ މަސައްކަތް ނުކުރާ ކަމަށް ބުނެ އޮސްޓްރޭލިއާ ސަރުކާރަށް ފާޑުކިޔުން ވަނީ އަމާޒުވެފަ އެވެ.
ބައެއް ފަރާތްތަކުން ބުނީ އެއަށްވުރެ ވަރުގަދަ ލަނޑުދަަނޑިއެއް ބޭނުންވާ ކަމަށާއި ފޮސިލް ފިޔުލް ނުވަތަ ތެލާއި ގޭސް ހިމެނޭ އާ އެއްވެސް މަޝްރޫއެއް ނުފެށުން މުހިއްމު ކަމަށެވެ.
އެކަމަކު ބޮޑު ވަޒީރު އެންތަަނީ އަލްބަނީޒް ވިދާޅުވީ އަލަށް ފާސްކުރި ގާނޫނާ އެކު މޫސުމީ ބަދަލުގެ މައްސަލައިގައި އަތް އުރާލައިގެން އޮސްޓްރޭލިއާއަށް އޮތް އޮތުން ނިމުނީ ކަމަށެވެ.
އޮސްޓްރޭލިއާގެ ކުރީގެ ސަރުކާރުން މޫސުމީ ބަދަލުގެ މަައްސަލަައިގައި ފިޔަވަޅު އަޅަން ބޭނުމެއް ނުވި އެވެ. އެހެން ނަމަވެސް، އަލްބަނީޒްގެ އާ ސަަރުކާރުގެ ވިސްނުން ތަފާތެވެ.
