ސްރީލަންކާގެ ރައީސްގެ ބާރުތައް ކުޑަ ކުރަން ގާނޫނުއަސާސީއަށް އިސްލާހު ގެނައުމުގެ ބިލް ވަރަށް އަވަހަށް ގާނޫނަކަށް ވާނެ ކަމަށް އެ ގައުމުގެ ފޮރިން މިނިސްޓަރު އަލީ ސަބްރީ ވިދާޅުވެއްޖެ އެވެ.
"އާ އިސްލާހާ އެކި ރައީސްގެ ބާރުތައް ކުޑަވެ، ވެރިކަން ހިންގުމުގައި ގިނަ ފަރާތްތަކުގެ ބައިވެރިވުން އަނެއްކާވެސް ދެމިއޮންނާނެ،" ސަބްރީ ނޫސްވެރިންނަށް ވިދާޅުވި އެވެ.
އެ ބިލް ފާސްވުމަށް ޕާލިމެންޓުގެ ތިންބައި ކޮށްފައި ދެބައި މެމްބަަރުންގެ ވޯޓު ބޭނުންވެ އެވެ. އެ ބިލް ހުށަހެޅީ އިގްތިސާދީ ކާރިސާއާ ގުޅިގެން ހަމަނުޖެހުން ބޮޑުވާން ފެށުމުންނެވެ.
އިގްތިސާދް މެނޭޖް ކުރުމުގައި ބޮޑެތި ގޯސްތަކެއް ހެއްދެވި ކަމަށް ތުހުމަތު ކުރެވޭ ކުރީގެ ރައީސް ގޮބަތަޔާ ރާޖަޕަކްސަ މިދިޔަ ޖުލައި މަހު ގައުމު ދޫކޮށް ވަޑައިގެން، އިސްތިއުފ ދެއްވި އެވެ.
އާ ރައީސްގެ މަގާމަށް ވަަޑައިގެންނެވީ ކުރީގެ ބޮޑު ވަަޒީރު ރަނިލް ވިކްރަމަސިންހަ އެވެ. މިދިޔަ ހުކުރު ދުވަހުގެ ރޭ ގޮތަބަޔާ ވަނީ އެނބުރި ލަންކާއަށް ވަޑައިގެންފަ އެވެ.
ގާނޫނު އަސާސީއަށް ހުށަހެޅި އިސްލާހުގެ ދަށުން ގާނޫނީ ކައިންސިލެއް ގާއިމްކޮށް، ވެރިކަން ހިންގުން ހަރުދަނާ ކުރަން ނުވަ މިނިވަން ކޮމިޝަން އުފައްދާނެ އެވެ.
އެ ކޮމިޝަންތަކުން މަސައްކަތް ކުރާނީ އިންސާނީ ހައްގުތައް ކުރިއަަރުވައި، ކޮރަޕްޝަނާ ދެކޮޅު ތަހުގީގުތައް ވަރުގަދަކޮށް، ސަރުކާރުގެ އެޖެންސީތައް ޖަވާބުދާރީ ކުރުވުމަށެވެ.
ސަބްރީ ވިދާޅުވީ ބައިނަލްއަގްވާމީ ހަމަތަކަށް ފެތޭ މުޅިން އާ ޓެރަރިޒަމް މަނާކުރުމުގެ ގާނޫނެއް ޑްރާފްޓް ކުރުމުގެ މަސައްކަތް ވެސް މިހާރު ކުރިއަށްދާ ކަމަށެވެ.
