މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ އާ އެގްޒެކެޓިވް ކޮމިޓީއެއް ހޮވައިފި އެވެ.
މިއަދު ހަވީރު ސްޓެލްކޯ ހޯލުގައި ބޭއްވި އެ އެސޯސިއޭޝަނުގެ ކޮންގްރެސްގައި ވަނީ އަލަށް ހަތަރު މެންބަރުން އިންތިހާބުވެފަ އެވެ. ޖުމްލަ ހަތް މެންބަރުން ތިބޭ އެ ކޮމިޓީއަށް ދެން އިންތިހާބުވީ ކުރިން ވެސް ތިބި ތިން މެންބަރުންނެވެ.
ޖުމުލަ 78 ނޫސްވެރިން ބައިވެރިވި އެ ކޮންގްރެސްގައި އެމްޖޭއޭގެ ރައީސްގެ މަގާމަށް އިންތިހާބުކޮށްފައި ވަނީ ކުރިން ވެސް އެ މަގާމުގައި ހުރި ވަން އޮންލައިންގެ މެނޭޖިން އެޑިޓަރު އަލީ ރިފްޝާން އެވެ. އަދި، ނައިބު ރައީސް ކަމަށް އިންތިހާބު ކޮށްފައި ވަނީ ވަގުތު ނޫހުގެ ޑެޕިއުޓީ އެޑިޓަރު މުހައްމަދު ޔާމީނެވެ.
ސެކެޓްރީ ޖެނެރަލްގެ މަގާމަށް ކުރިން ވެސް އެ މަގާމުގައި ހުރި ދައުރުގެ ސީނިއާ އެސޯސިއޭޓް އެޑިޓަރު އަހްމަދު ނާއިފު އިންތިހާބު ކުރިއިރު، ބަޖެޓް ސެކްރެޓަރީގެ މަގާމަށް ވެސް އިންތިހާބުކުރީ ކުރިން އެ މަގާމުގައި ހުރި އަދަދު ނޫހުގެ އެސޯސިއޭޓް އެޑިޓަރު ނާޒިމް ހަސަނެވެ.
މީގެ އިތުރުން އެމްޖޭއޭގެ އާންމު މެންބަރެއްގެ ގޮތުގައި ދައުުރު ނޫހުގެ ނޫސްވެރިޔާ މުހައްމަދު މުޒައްޔިން ނާޒިމް އިންތިހާބުކުރިއިރު، އެމްޖޭއޭގެ އެގްޒެކެޓިވް ކޮމިޓީގައި އަންހެނުންނަށް ހާއްސަކޮށްފައިވާ ދެ ޖާގައަށް ވެސް މެންބަރުން ވަނީ އިންތިހާބުކޮށްފަ އެވެ.
އަންހެނުންނަށް ހާއްސަ ދެ މެންބަރުން އެމްޖޭއޭގެ އެގްޒެކެޓިވް ކޮމިޓީގައި ހިމެނުމަށް ނިންމާފައި ވަނީ މިދިޔަ ޖޫން މަހު ބޭއްވި އަހަރީ އާންމު ޖަލްސާގަ އެވެ. މިއަދު ބޭއްވި ކޮންގްރެސްގައި އެ ދެ މަގާމަށް ތިން މެންބަރުން ކުރިމަތިލި އެވެ. އެއީ ވަގުތު ނޫހުގެ ނޫސްވެރިޔާ އާމިނަތު ނިއުޝާ، އަދަދު ނޫހުގެ ނޫސްވެރިޔާ އައިޝަތު ނުޒުހާގެ އިތުރުން މިހާރު ނޫހުގެ ސީނިއާ ރިޕޯޓަރު އާސިމާ ނިޒާރެވެ. އެ މަގާމަށް އިންތިހާބުވީ ނުޒުހާ އާއި އާސިމާ އެވެ.
