ސްރީލަންކާގެ ދަރަނި ރީސްޓްރަކްޗާ ކުރުމުގައި އެހެން ގައުމުތަކާއި ބައިނަލްއަގްވާމީ މާލީ އިދާރާތަކާ އެކު ޕޮޒިޓިވް ދައުރެއް އަދާކުރަން ތައްޔާރު ކަމަށް ޗައިނާއިން ބުނެފި އެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ޒާއޯ ލިޖިއަން ހުކުރު ދުވަހު ވިދާޅުވީ މި ވަގުތު ސްރީލަންކާއަށް ކުރިމަތިވަމުންދާ ދަތިތަކުން އަރައިގަންނަ ކުރާ މަސައްކަތަށް ވެސް ޗައިނާއިން އެއްބާރުލުން ދޭނެ ކަމަށެވެ.
"ސްރީލަންކާއަށް ކުރިމަތިވެފައިވާ އުނދަގޫތަކާއި ގޮންޖެހުންތަކަށް ޗައިނާއިން ދަނީ ބޮޑު ސަމާލުކަމެއް ދެމުން. ސްރީލަންކާގެ އިގްތިސާދީ އަދި އިޖްތިމާއީ ތަަރައްގީއަށް ފޯރުކޮށްދެވެން ހުރި ހުރިހާ އެހީއެއް މި ދަނީ ދެމުން،" އޭނާ ވިދާޅުވި އެވެ.
އޭގެ އިތުރުން ސްރީލަންކާގެ އުނދަގޫތަކަށް ހައްލު ހޯދަން މާލީ އިދާރާތަކަށް ވެސް ޗައިނާއިން އެއްބާރުލުން ފޯރުކޮށްދެމުންދާ ކަމަަށް އޭނާ ވިދާޅުވި އެވެ.
ދާދި ފަހުން ޖަޕާނުގެ ފިނޭންސް މިނިސްޓަރު ޝުނިޗީ ސުޒުކީ ވަނީ ލަންކާއަށް ލޯން ދިން ހުރިހާ ގައުމަކުން ވެސް ދަރަނި ރީސްޓްރަކްޗާ ކުރުމުގެ މަޝްވަރާގައި ބައިވެރިވުމަށް ގޮވާލައްވާފަަ އެވެ.
އިގްތިސާދީ، އިޖްތިމާއީ އަދި ސިޔާސީ ކާރިސާއެއް ކުރިމަތިވެފައިވާ ލަންކާއިން ދަރަނި ރީސްޓްރަކްޗާ ކުރުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބޭނުންވެ އެވެ.
އެހެން ނަމަވެސް، ޗައިނާއަކީ ދަރަނި ރީސްޓްރަކްޗާ ކުރުމުގެ ސިޔާސަތު ގެންގުޅޭ ގައުމެއް ނޫނެވެ. އެހެންވެ، ދާދި ފަހުން ވެސް ސްރީލަންކާއަށް ވަނީ ޗައިނާގެ ބޭންކުތަކަށް ދަރަނި އަދާ ކުރަން ޗައިނާ ސަރުކާރުން އިތުރު ލޯނެއް ނަގަން އެދި ހުށަހަޅަން މަޖުބޫރުވެފަ އެވެ.
