އަފްގާނިސްތާނުގެ މެދުތެރޭގައި އޮންނަ ހިރާތު ސިޓީގެ މިސްކިތަކަށް ހުކުރު ދުވަހު ދިން ހަމަލާގައި ތާލިބާނުންގެ ދީނީ އިލްމުވެރިޔަކާ އެކު 18 މީހުން މަރުވެއްޖެ އެވެ.
އިންޓީރިއާ މިނިސްޓްރީން ބުނީ ހަމަލާގައި 23 މީހުންނަށް އަނިޔާވި ކަމަށެވެ. މަރުވި މީހުންގެ ތެރޭގައި ހިމެނޭ މުޖީބުއްރަހްމާން އަންސާރީއަކީ ތާލިބާނުންގެ ތެރޭގައި މަގްބޫލް އިލްމުވެރިއެކެވެ.
ހަމަލާ ދިނީ އޭނާ އާއި ގާޑުން ހުކުރު ނަމާދަށް މިސްކިތަށް ވަންނަނިކޮށެވެ. ތާލިބާނުން ބުނީ އަންސާރީގެ މަރުގެ ފަހަތުގައިވާ އެންމެންނަށް އަދަބު ދޭނެ ކަމަށެވެ.
މީގެ އަހަަރެއް ކުރިން އަފްގާނިސްތާނުގެ ވެރިކަމަށް އައި ތާލިބާނުން ބުނީ ގައުމުގެ ސެކިއުރިޓީ ވަރުގަދަކޮށްފައިވާ ކަމަށެވެ. ނަމަވެސް ދޭތެރެ ދޭތެރެއިން މިސްކިތްތަކަށް ހަމަލާ ދެ އެވެ.
ހަމަލާތައް އިތުރު ވާތީ އދ. އިން ކަންބޮޑުވުން ފާޅުކޮށްފައިވާ އިރު، ބައެއް ހަމަލާތަކުގެ ޒިންމާ އުފުލީ އިސްލާމިކް ސްޓޭޓް (އައިއެސް) ގެ އަފްގާން ގޮފިންނެވެ.
ހުކުރު ދުވަހު ދިން ހަމަލާގެ ޒިންމާ އަދި އެއްވެސް ބަޔަކު ނުއުފުލަ އެވެ.
