އިގްތިސާދީ ކާރިސާއާ ގުޅިގެން އިސްތިއުފާއަށް ގޮވައި ރައްޔިތުން މުޒާހަރާ ކުރަން ފެށުމުން މިދިޔަ ޖުލައި މަހު ފިއްލަވައިގެން ވަޑައިގެންނެވި ކުރީގެ ރައީސް ގޮތަބަޔާ ރާޖަޕަކްސަ އެނބުރި ގައުމަށް ވަޑައިގެންފި އެވެ.
ލަންކާ ދޫކޮށް އެމަނިކުފާނު އެންމެ ފުރަތަމަ ވަޑައިގެންނެވީ ރާއްޖެ އަށެވެ. އޭގެ ފަހުން ސިންގަޕޫރަށް ވަޑައިގެން ރައީސްކަމުން އިސްތިއުފާ ދެއްވި އެވެ. ސިންގަޕޫރުގައި ދުވަސްތަކެއް ހޭދަކުރެއްވުމަށް ފަހު، މިއަދާ ހަމައަށް އެމަނިކުފާނު ތައިލޭންޑްގައި ހުންނެވީ ވަގުތީ ވިސާއެއްގެ ދަށުންނެވެ.
ރިޕޯޓުތައް ބުނާ ގޮތުން ގޮތަބަޔާ އެނބުރި ލަންކާއަށް ވަޑައިގެންނެވީ ސިންގަޕޫރު މަގުންނެވެ. ލަންކާ އެއާޕޯޓުން އެމަނިކުފާނަށް މަރުހަބާ ދެންނެވީ ލަންކާގެ ބައެއް މިނިސްޓަރުންނެވެ.
އެ ގައުމުގެ ނޫސްތަކުން ރިޕޯޓު ކުރާ ގޮތުގައި ކޮލޮމްބޯގައި ގޮތަބަޔާއަށް ހާއްސަ ގެކޮޅެއް ލަންކާ ސަރުކާރުން ވަނީ ހަމަޖައްސައިދީފަ އެވެ.
ޑިފެންސް މިނިސްޓްރީގެ އޮފިޝަލަކު ބީބީސީއަށް ވިދާޅުވީ ކުރީގެ ރައީސުންނަށް ދޭން ޖެހޭ ސެކިއުރިޓީ އެމަނިކުފާނަށް ފޯރުކޮށްދޭނެ ކަމަށެވެ.
މިހާރު ރައީސްކަމުގައި ހުންނެވި ރަނިލް ވިކްރަމަސިންހަ ދާދި ފަހުން ވިދާޅުވެފައި ވަނީ މިއީ ގޮތަބަޔާ އެނބުރި ގައުމަށް ވަޑައިގަަންނަވަން އެންމެ ރަނގަޅު ވަގުތު ނޫން ކަމަށެވެ.
"މިއީ އެމަނިކުފާނު ގައުމަށް އެނބުރި ވަޑައިގަންނަވަން އެންމެ ރަނގަޅު ވަގުތު ކަމަށް އަޅުގަނޑަކަށް ނުފެނޭ. އެމަަނިކުފާނުގެ އަވަސް މުސްތަގްބަލެއްގައި އެނބުރި ވަޑައިގަންނަވާނެ ކަމަށް ނުވެސް ބެލެވޭ،" ރަނިލް ވިދާޅުވި އެވެ.
"މިއީ އެމަނިކުފާނު ގައުމަށް އެނބުރި ވަޑައިގަންނަވަން އެންމެ ރަނގަޅު ވަގުތު ކަމަށް އަޅުގަނޑަކަށް ނުފެނޭ. އެމަަނިކުފާނުގެ އަވަސް މުސްތަގްބަލެއްގައި އެނބުރި ވަޑައިގަންނަވާނެ ކަމަށް ނުވެސް ބެލެވޭ،"
