ޕެރިސް، ފްރާންސް (01 ސެޕްޓެމްބަރު) - ބްރެޒިލްގެ ނޭމާ އާއި ފްރާންސްގެ އެމްބާޕޭގެ މޮޅު ކުޅުމާއެކު ފްރާންސްގެ ޗެމްޕިއަން ޕީއެސްޖީ އިން ޓޫލޯސްގެ މައްޗަށް 3-0 ނަތީޖާއަކުން ކުރި ހޯދައިފި އެވެ.
ރޭގެ މޮޅާއެކު ފަސް މެޗުން 13 ޕޮއިންޓު ހޯދައިގެން ޕީއެސްޖީ އޮތީ ލީގުގެ އެއްވަނައިގަ އެވެ. ދެވަނަގައި އުޅޭ ލެންސް އަދި ތިންވަނައިގައި އުޅޭ މާސޭއަށްވެސް ވަނީ 13 ޕޮއިންޓު ލިބިފަ އެވެ. ޕީއެސްޖީ ކުރީގައި އޮތީ ފައިދާ ގޯލުގެ ތަފާތުންނެވެ. އެޓީމުން ފަސް މެޗުގައި 21 ގޯލު ޖެހިއިރު، ބައިކޮޅަށް ވަތް ހަތަރު ގޯލާއެކު ފައިދާ 17 ގޯލު އެބައޮތެވެ. ލެންސާއި މާސޭއަށް ލިބިފައިވަނީ ފައިދާ އަށް ގޯލެވެ.
ގިނަ ހަމަލާތަކެއް ޕީއެސްޖީ އިން ފޮނުވާލި ރޭގެ މެޗުގައި އެޓީމަށް ފުރަތަމަ ގޯލު ޖަހައިދިނީ 37 ވަނަ މިނެޓުގައި ނޭމާ އެވެ. މިއީ މެސީ އޭރިއާ ތެރެއަށް ޖައްސާލި ޕާހެއްގައި އޮފްސައިޑް މަޅިން ނެއްޓި އޭރިއާ ތެރެއަށް ވަދެ ނޭމާ ޖެހި ގޯލެކެވެ. މި ގޯލު ފުރަތަމަ ރެފްރީ ނިންމީ އޮފްސައިޑު ކަމަށެވެ. ނަމަވެސް ވީއޭއާރު ބެލުމަށްފަހު ނޭމާ އޮންސައިޑް މަގާމެއްގައި ހުރުމުން ރެފްރީ ވަނީ އެއީ ގޯލެއްކަމަށް ނިންމާފަ އެވެ.
ޕީއެސްޖީގެ ދެވަނަ ލަނޑު އެމްބާޕޭ ޖެހީވެސް މެސީގެ އެހީތެރިކަމާއެކުގަ އެވެ. މެޗު ތެރެއިން މާކޯ ވެރާޓީ ކުރިއަށް ދިން ބޯޅައާއެކު އޭރިއާ ތެރެއަށް ވަދެ ކައިރީގައި ހުރި ޑިފެންޑަރު ބީޓުކޮށްލާފައި މެސީ ދިނީ އެމްބާޕޭ އަށެވެ. އޭނާ ވަނީ ތިރިތިން ބާރު ހަމާލާ އެއް ފޮނުވާލައި އެ ބޯޅަ ގޯލަށް ވައްދާލާފަ އެވެ.
ފްރާންސްގެ ޗެމްޕިއަން ޕީއެސްޖީގެ ފަހު ލަނޑު ޖެހީ ޑިފެންޑަރު ހުއާން ބާނަޓު އެވެ. އޭރިއާ ބޭރުން އެމްބާޕޭ ފޮނުވާލި ބާރު ހަމަލާ އަރިމަތީ ދަނޑީގައި ޖެހިފައި ނުކުތް ވަގުތު ލިބުނީ ބާނަޓަށެވެ. ބާނަޓު ވަނީ ފަސޭހަކަމާއެކު އެބޯޅަ ގޯލަށް ވައްދާލާފަ އެވެ.
ފްރާންސް ލީގުގައި ރޭ ކުޅުނު އެހެން މެޗުތަކަށް ބަލާއިރު، ލީގުގެ ދެވަނައިގައި އޮތް ލެންސް މޮޅުވީ ލޮރިއެންޓާ ވާދަކޮށް 5-2 އިންނެވެ. ތިންވަނައިގައި އޮތް މާސޭ މޮޅުވީ ކްލާމޮންޓާ ވާދަކޮށް 1-0 އިންނެވެ. ލިލް އާއި ނީސްގެ ކުރިމަތިލުން 2-1 އިން ކާމިޔާބުކުރީ ނީސް އެވެ. ރޭގެ ފަހު މެޗުގައި ރެނޭސް އިން ވަނީ ބްރެސްޓުގެ މައްޗަށް 3-1 ގެ ނަތީޖާ އަކުން ކުރި ހޯދާފަ އެވެ.
