ރާއްޖޭގައި އޭލެވެލް ހަދާ ދަރިވަރުންނަށް ދެމުން ގެންދާ އެޑެކްސަލް އިމްތިހާންގެ ބަދަލުގައި ކޭމްބްރިޖް އިމްތިހާން ދޭން ނިންމި ސަބަބުތައް އެޑިއުކޭޝަން މިނިސްޓަރު އާއިޝަތު އަލީ މިއަދު ސާފުކޮށްދެއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދާންދޫ ދާއިރާގެ މެންބަރު ޔައުގޫބް އަބްދުﷲ ވަނީ އޭލެވެލް އިމްތިނަށް ގެނައި ބަދަލާ ގުޅިގެން ދަރިވަރުންގެ ކިޔެވުމާއި ނަތީޖާއަށް އަންނާނެ ބަދަލުތަކާ ގުޅޭ ގޮތުން މިނިސްޓަރާ ސުވާލުކުރައްވާފަ އެވެ.
"[ކަމާ ގުޅޭ ހުރިހާ އިސްވެރިން ބޭއްވި] ބައްދަލުވުމުން އަޅުގަނޑުމެންނަށް ފާހަގަކުރެވުނީ ކެމްބްރިޖު އޯލެވެލް ހަދާފަ، އެޑެކްސެލް އޭލެވެލް ހަދާތީ އެ ޓްރާންސިޝަން ދަރިވަރުންނަށް ވަރަށް އުނދަގޫވާ ކަމަށް، އަދި އެ ކަމުގެ ސަބަބުން ވަރަށް ގިނަ ދަރިވަރުން އޭ ލެވެލް ފަށާފައި އޭލެވެލް ޑްރޮޕް ކުރާ ކަމަށް،" އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި އެއް ބޯޑެއްގެ އިމްތިހާނަކަށް ދެ އިމްތިހާނު ވެސް ބަދަލުވެގެން ދިއުމުން އެކަމުގެ ފަސޭހަތައް ވަރަށް ބޮޑަށް ވެގެން ދާނެ އެވެ.
"އިންޓަނޭޝަނަލީ ފޯކަސްޑް އެގްޒާމެއް ދިވެހިރާއްޖޭގެ ކުދިން ހަދަންޏާ އެ ކުދިންނަށް މާބޮޑަށް ކޮންޓެކްސްޓުއަލީ ރިލެވެންޓް ވާނެ ސުވާލުތަކާ އެކަހަލަ ކަންތައްތައް، އެހެންކަމުން ދަރިވަރުންނަށް ފަސޭހަތަކެއް ވާނެ،" މިނިސްޓަރު ވިދާޅުވި އެވެ.
"އެހެންކަމުން ވަރަށް ބޮޑަށް މަޝްވަރާ ކުރެވި، އޭލެވެލް ކިޔައިދޭ ހުރިހާ ސުކޫލުތަކެއްގެ ޕްރިންސިޕަލުންނާއި މުދައްރިސުންނާ ހުރިހާ ބޭފުޅުން ލަފާ އެރުވީ އެޑެކްސެލްއަށް ވުރެ ކެމްބްރިޖު އޭލެވެލް މާ ރަނގަޅުވާނެއޭ ދިވެހިރާއްޖޭގައި،"
އިމްތިހާނު ބަދަލުކުރުމުން ކޮލިޓީއަށް ބަދަލު އަންނާނެ ކަމަށް ބުނެ ކިޔަމުން އަންނަ ފާޑުކިޔުންތަކަށް ރައްދު ދެއްވަމުން މިނިސްޓަރު ވިދާޅުވީ ދެ އިމްތިހާނަކީ ވެސް އެއް ލެވެލްގެ ދެ އިމްތިހާނު ކަމަށާއި މިފަދަ ނިންމުންތަކުގައި ބަލަނީ ވަކި މީހަކު ދެކޭ ގޮތަށް ވުރެ ބޮޑަށް ހެދިފައި ހުރި ދިރާސާތަކާއި ހެކިތަކަށް ކަމަށެވެ.
މީގެ އިތުރުން، އެޑިއުކޭޝަން މިނިސްޓްރީން އެޑެކްސެލްއާ ސީދާކޮށް މުއާމަލާތު ކުރެވެން ނޯންނާތީ ވެސް އުނދަގޫތަކެއް ކުރިމަތިވާ ކަން މިނިސްޓަރު ފާހަގަކުރެއްވި އެވެ. އެގޮތުން އެ އެޑެކްސެލްއާ މުއާމަލާތު ކުރަނީ އަވައްޓެރި ލަންކާގައި ހުންނަ އޮފީހެއް މެދުވެރިކޮށް ކަމަށާއި އެ ކަމުގެ ސަބަބުން ވެސް ދަތިތަކެއް ކުރިމަތިވާ ކަމަށް ވިދާޅުވި އެވެ.
"އޭލެވެލް އިމްތިހާނު ދެ ފަހަރެއްގެ މަތީން އޭ ލެެވެލް ޕޭޕާ ވެސް ލީކުވެގެން ދިޔަ، އެހެންވީމާ މިކަހަލަ ކަންތައްތަކެއް ވެސް ޑިސިޝަން ނެގުމުގައި މިކަހަލަ ކަންކަން ވެސް އަސަރުކޮށްފައިވޭ،" މިނިސްޓަރު ވިދާޅުވި އެވެ.
ކެމްބްރިޖު އިމްތިހާނު ދޭނީ އަންނަ އަހަރު
އެޑެކްސަލް އިންޓަނޭޝަނަލް އޭއެސް އަދި އޭލެވެލް އިމްތިހާނުގެ ބަދަލުގައި ކޭމްބްރިޖް އިންޓަނަލް އޭއެސް އަދި އޭލެވެލް އިމްތިހާނު ދިނުމަށް ނިންމި ނަމަވެސް މި އަހަރު މަތީ ސާނަވީ ގްރޭޑް 11 ގައި ކިޔެވުން ފަށާ ދަރިވަރުންގެ އިމްތިހާނުތަކަށް އެއްވެސް ބަދަލެއް ނާންނާނެ އެވެ.
މިގޮތުން ކޭމްބްރިޖް އިންޓަނޭޝަލް އޭއެސް އަދި އޭލެވެލް ސިލަބަހަށް ކިޔަވައިދިނުމާއި އިމްތިހާނުތައް ފަށާނެ ގޮތުގެ ޝެޑިއުލް މިނިސްޓްރީން ވަނީ އާއްމު ކޮށްފަ އެވެ.
- 2023-2024 ވަނަ އަހަރު ކެމްބްރިޖް އިންޓަނޭޝަނަލް އޭ-އެސް އިމްތިހާނު ބޭއްވުން
- 2024 ވަނަ އަހަރުގެ އޮކްޓޫބަރު/ ނޮވެމްބަރުގައި އިމްތިހާނު ބޭއްވުން
- 2024-2025ވަނަ އަހަރު ކެމްބްރިޖް އިންޓަނޭޝަނަލް އޭ-އެސް އިމްތިހާނު ބޭއްވުން
- 2025ވަނަ އަހަރުގެ އޮކްޓޫބަރު/ ނޮވެމްބަރުގައި އިމްތިހާނު ބޭއްވުން
