ޕެރިސް (އޮގަސްޓް 29) - ފްރެންޗް ލީގުގައި ރޭ ނޭމާ ޖެހި ޕެނަލްޓީން މޮނާކޯއާ 1-1 އިން އެއްވަރުކޮށް، ޕީއެސްޖީ ބަލިނުވެ ސަލާމަތްވެއްޖެ އެވެ.
އާ ކޯޗު ކްރިސްޓޮފް ގަލްޓިއޭއާ އެކު ޕީއެސްޖީން ލީގު ސީޒަން ފެށީ ފުރަތަމަ ތިން މެޗުން މޮޅުވެގެންނެވެ. އެކަމަކު، ރޭ ޕީއެސްޖީ އަށް ކުރިމަތިލާން ޖެހުނީ ތަފާތު ޗެލެންޖަކާ އެވެ.
ޕީއެސްޖީގެ ޑިފެންސްލައިން ކުރިއަށް ޖެހިގެން ތިބި ވަގުތެއްގައި ފަހަތަށް އައި ބޯޅައެއް ހޯދައި، މޮނާކޯގެ ފޯވާޑް ކެވިން ވޮލަންޑް ވަނީ އެ ޓީމަށް މެޗުގެ 20 ވަނަ މިނިޓްގައި ލީޑުނަގައިދީފަ އެވެ. މޮނާކޯ އަށް ލީޑުފުޅާކޮށްދޭން، ފުލްބެކް، ކާލޯ ހެންރީކޭ ޖެހި ހިލޭ ޖެހުން ޕީއެސްޖީގެ ކީޕަރު ޖިއަންލުއީޖީ ޑޮންނަރުންމާ ވަނީ މަތަކޮށްފަ އެވެ.
މެޗުގެ 35 ވަނަ މިނިޓްގައި ޕީއެސްޖީ އަށް އެއްވަރުކޮށްދޭން ލިބުނު ރަނުގެ ފުރުސަތެއް ކީލިއަން އެމްބާޕޭ އަތުން ވަނީ ގެއްލިފަ އެވެ. އޭރިއާބޭރުން ޕީއެސްޖީގެ ލިއޮނަލް މެސީ ޖެހި ބާރު ބޯޅަ ގޯލުގެ ދަނޑީގައި ޖެހިފައި އޭރިއާތެރެއިން އެމްބާޕޭ އަށް ލިބުމުން ހުސް ގޯލަކަށް ފޮނުވާލަން ލިބުނު ފުރުސަތުގައި އޭނާ ޖެހި ޝޮޓް އަމާޒުވީ ގޯލުގެ ދަނޑިއަށެވެ.
ޕީއެސްޖީން އެއްވަރުކުރީ 70 ވަނަ މިނިޓްގައި ނޭމާ ޖެހި ޕެނަލްޓީންނެވެ. މިއީ ނޭމާ އަށް މޮނާކޯގެ ޑިފެންޑަރު، ގިލެރްމޭ މަރިޕަން ކުރި ފައުލަަކަށް ދިން ޕެނަލްޓީއެކެވެ. މިއީ މި ފަހަރުގެ ސީޒަނުގައި ކުޅުނު ފަސް މެޗުން ނޭމާ ޖެހި އަށް ވަނަ ގޯލެވެ.
މެޗަށް ފަހު ޕީއެސްޖީގެ ކޯޗު ގަލްޓިއޭ ބުނީ ފުރަތަމަ ހާފުގައި އޭނާގެ ޓީމަށް ކުޅެން އުނދަގޫވި ކަމަށާއި އެކަމަކު ދެ ވަނަ ހާފުގައި ދެއްކި ކުޅުމަށް ބަލާއިރު، މޮޅެއް ހައްގުވާ ކަމަށެވެ.
ފްރެންޗް ލީގުގައި ރޭ މާސޭ ވަނީ 3-0 އިން ނީސް ދަނޑުގައި މޮޅުވެފަ އެވެ. މާސޭގެ ތިން ގޯލުގެ ތެރެއިން ދެ ގޯލު ޖެހީ މި ފަހަރުގެ ޓްރާންސްފާގައި އިންޓަ މިލާންގެ ކޮންޓްރެކްޓް އުވާލައި، މާސޭ އަށް ބަދަލުވި ޗިލީގެ ފޯވާޑް އަލެކްސިސް ސަންޗޭޒް އެވެ. އަނެއް ލަނޑު ޖެހީ އާސެނަލްގެ ލޯން އެއްބަސްވުމެއްގެ ދަށުން މާސޭ އަށް ކުޅެމުން އަންނަ ނޫނޯ ޓަވާރޭސް އެވެ.
ލީގުގެ އެއް ވަނައިގައި އޮތް ޕީއެސްޖީ އާއި ދެ ވަނައިގައި އޮތް މާސޭ އަދި ތިން ވަނައިގައި އޮތް ލެންސަށް ވެސް ވަނީ 10 ޕޮއިންޓް ލިބިފަ އެވެ.
