އިންޑިއާގެ އުއްތަރު ޕްރަދޭޝްގައި ގަވާއިދާ ހިލާފަށް އިމާރާތްކޮށްފައި ހުރި 40 ބުރީގެ ދެ ޓަވަރު ތަޅާލަން ކޯޓުން ކުރި އަމުރު ނުވަ އަހަރަށް ފަހު އާދީއްތަ ދުވަހު ތަންފީޒުކޮށްފި އެވެ.
އިންޑިއާގައި ގަވާއިދާ ހިލާފަށް ހަދާ އިމާރާތްތައް ގިނަވި ނަމަވެސް ބޮޑެތި އިމާރާތްތައް ތަޅާލުމަކީ މަދުން ނޫނީ ނުފެންނަ ކަމެކެވެ.
އުއްތަރު ޕްރަދޭޝްގެ ނޮއިޑާގައި ހުރި ސުޕަޓެކް ޓްވިން ޓަވަރު ވެގެން ދާނީ އިމާރާތްކުރުމުގެ ގަވާއިދާ ހިލާފުވެގެން އިންޑިއާގައި ތަޅާލި އެންމެ ބޮޑު އިމާރާތަށް ކަމަށް ކަމާބެހޭ އިދާރާތަކުން ބުނެ އެވެ.
އެ ދެ ޓަވަރު ގޮއްވާލަން ނެގީ 15 ސިކުންތެވެ. ނަމަވެސް އުފެދުނު ހިރަފުހާއި ދުން މައިތިރިވީ 12 މިނެޓު ފަހުންނެވެ.
ތިންސަތޭކަ ތިރީސް އަށް ފޫޓު އުސްކޮށް އިމާރާތްކޮށްފައި ހުރި މި އެޕާޓްމެންޓް ޓަވަރުތައް ތަޅާލަން ހައި ކޯޓުން 2014 ގައި އަމުރު ކުރީ، އެ ދެ ޓަވަރު ބިނާކުރަމުން ދިޔައީ ގަވާއިދާ ހިލާފު ކަމަށް ތުހުމަތުކޮށް ހުށަހެޅި މައްސަލައިގަ އެވެ. އެ މަޝްރޫއުގެ ފުރަތަަމަ ޕްލޭންގައި ނުވަ ބުރީގެ 14 ޓަވަރު އިމާރާތް ކުރަން އޮތްއިރު، އިމާރާތް ކުރީ 40 ބުރީގެ ދެ ޓަވަރެވެ.
މި މައްސަލައިގައި ހައި ކޯޓުން ކުރި ހުކުމް ތަންފީޒުކުރުން ދިގު ދެމިގެން ގޮސްފައި އޮއްވައި 2021 ވަނަ އަހަރު ސުޕްރީމް ކޯޓުން ނިންމީ ތިން މަސް ދުވަހުގެ ތެރޭގައި އިމާރާތް ތަޅާލުމަށެވެ.
އެ އަމަރު ތަންފީޒުކުރުން އަހަރަކަށް ދިގު ދެމިގެން ދިޔައީ "ޓެކްނިކަލް ދަތިތަކެއް" ހުރެގެން ކަމަށް ކަމާބެހޭ ފަރާތްތަކުން ބުނެ އެވެ.
ދެ ޓަވަރު ގޮއްވާލުމުގެ ކުރިން އެ ސަރަހައްދުން 7000 މީހުން ވަގުތީ ގޮތުން އެހެން ސަރަހައްދުތަކަށް ވަނީ ބަދަލުކޮށްފަ އެވެ
