ލަންޑަން (އޮގަސްޓް 28) - ހެރީ ކޭންގެ ކެރިއަރުގައި ޖެހި 200 ވަނަ ލީގު ގޯލާ އެކު ޓޮޓެންހަމް ހޮޓްސްޕާސް އިން މިރޭ އިނގިރޭސި ޕްރިމިއާ ލީގުގައި 2-0 އިން ނޮޓިންހަމް ފޮރެސްޓް އަތުން މޮޅުވެއްޖެ އެވެ.
ކޭން، 29، ކެރިއަރުގައި މިރޭގެ ދެ ގޯލާ އެކު ވަނީ 200 ލީގު ގޯލު ހަމަކޮށްފަ އެވެ. މީގެ ތެރޭގައި ހިމެނެނީ އިނގިރޭސި ޕްރިމިއާ ލީގުގައި ޖެހި 186 ގޯލާއި ދެ ވަނަ ޑިވިޝަން (ޗެމްޕިއަންޝިޕް)ގައި ޖެހި ނުވަ ގޯލާއި ލީގު ވަން (ތިން ވަނަ ޑިވިޝަން)ގައި ޖެހި ފަސް ގޯލެވެ. ޕްރިމިއާ ލީގުގައި ޓޮޓެންހަމަށް ކުޅުނު ކޭން ވަނީ ލޯން ޑީލެއްގައި ލެސްޓާ ސިޓީ އާއި މިލްވޯލް އަދި ލޭޓަން އޯރިއެންޓަށް ކުޅެފަ އެވެ.
ނޮޓިންހަމް ފޮރެސް ދަނޑުގައި މިރޭ ޓޮޓެންހަމަށް ލީޑުނަގައިިދިން ގޯލު ކޭން ޖެހީ މެޗުގެ ފަސް ވަނަ މިނިޓްގަ އެވެ. ޓޮޓެންހަމްގެ ވިންގް ޑޭޔާން ކުލުސެވްސްކީ ދިން ބޯޅައެއް ކޮންޓްރޯލް ކޮށްލުމަށް ފަހު އޭރިއާބޭރުން ކޭން ޖެހި ބޯޅަ ތިރިތިރިން ގޮަސް އަމާޒުވީ ގޯލުގެ ދުުރު ކަނަށެވެ. ޓޮޓެންހަމަށް ލީޑުފުޅާކޮށްދޭން މެޗުގެ 56 ވަނަ މިނިޓްގައި ކޭން ފޮނުވާލި ޕެނަލްޓީ ނޮޓިންހަމްގެ ގޯލްކީޕަރު ޑީން ހެންޑަސަން ވަނީ މަތަކޮށްފަ އެވެ.
ނޮޓިންހަމް އިން ދެ ވަނަ ހާފުގައި ޓޮޓެންހަމް އަށް ޕްރެޝަރު ކުރި ނަމަވެސް ގޯލެއް ނުޖެހުނެވެ. ކޭން ވަނީ މެޗުގެ 81 ވަނަ މިނިޓްގައި ޓޮޓެންހަމަށް ދެ ވަނަ ގޯލެއް ޖަހައިދީ އެ ޓީމު މޮޅުކޮށްދީފަ އެވެ. މިއީ ރިޗާލިސަން ދިން ބޯޅައަކުން ކޭން ބޮލުން ޖެހި ގޯލެކެވެ.
މެޗަށް ފަހު ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނީ މިއީ ވަރަށް އުނދަގުލުން ހޯދި މޮޅެއް ކަމަށާއި އެ ޓީމުން ކާމިޔާބު ހޯދީ ޓީމެއްގެ ގޮތުގައި ވަރަށް އުނދަގޫ ފައްތަރެއްގައި ކުޅެގެން ކަމަށެވެ. އަދި ސީޒަން ކުރިއަށްދާ ވަރަކަށް ޕްރެޝަރުގައި ގިނަ މެޗުތަކެއް ކުޅެން ޖެހޭއިރު، ޓޮޓެންހަމްގެ ޓީމު ރޫހު ރަނގަޅަށް އޮތުމަކީ ކޮންޓޭ އަށް އޮތް ހިތްހަމަޖެހުމެކެވެ.
މި މޮޅާ އެކު ޓޮޓެންހަމް އޮތީ ލީގުގެ ތިން ވަނައިގަ އެވެ. އެއް ވަނައިގައި އޮތް އާސެނަލަށް ހަތަރު މެޗުން 12 ޕޮއިންޓް ލިބިފައިވާއިރު، ދެ ވަނައިގައި އޮތް މެންޗެސްޓާ ސިޓީ، ތިން ވަނައިގައި އޮތް ޓޮޓެންހަމް އަދި ހަތަރެއްގައި އޮތް ބްރައިޓަން އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ.
ލީގުގައި މިރޭ ވުލްވްސް އާއި ނިއުކާސަލް ޔުނައިޓެޑްގެ މެޗު ވަނީ 1-1 އިން އެއްވަރުވެފަ އެވެ. ރުބެން ނެވޭސް އޭރިއާބޭރުން ޖެހި ގޯލަކުން ވުލްވްސް ލީޑުނެގި މި މެޗުގެ ފަހު މިނިޓްގައި އޭރިއާބޭރުން ވޮލީ އަކުން އެލަން ސެއިން މެކްސިމައިން ޖެހި ލަނޑުން ނިއުކާސަލް ވަނީ އެއްވަރުކޮށްފަ އެވެ. އެސްޓަން ވިލާ ދަނޑުގައި ވެސްޓް ހޭމް ޔުނައިޓެޑް މޮޅުވީ ޕަބްލޯ ފޯނާލްސް ޖެހި ގޯލުން 1-0 އިންނެވެ. ވެސްޓް ހޭމް އިން ލީގުގައި ފުރަތަމަ މޮޅު ހޯދިއިރު، އެސްޓަން ވިލާ ކުޅުނު ހަތަރު މެޗުގެ ތެރެއިން ތިން މެޗުން ބަލިވެ، އެ ޓީމުގެ ކޯޗު ސްޓީވެން ޖެރާޑަށް ވަނީ ޕްރެޝަރު ބޮޑުވެފަ އެވެ.
