ޕާކިސްތާނުގައި ފެންބޮޑުވުމުގެ ނުރައްކާ އޮތް ހިސާބުތަކުގައި ދިރިއުޅޭ އެތައް ހާސް ބަޔަކު ރައްކާތެރި ހިސާބުތަކަށް ބަދަލުވާން އަންގައިފި އެވެ.
ފަހުގެ ތާރީހެއްގައި ވާރޭ ނުވެހޭ މިންވަރަށް މިހާރު ޕާކިސްތާނުގެ ބައެއް ހިސާބުތަކަށް ވާރޭ ވެހެމުން ދާތީ ބޮޑު ކާރިސާއެއް ދިމާވެފައިވާ ކަމަށް އެހީދޭ ޖަމިއްޔާތަކުން ބުނެ އެވެ.
މިދިޔަ ޖޫން މަހުން ފެށިގެން 1000 އެއްހާ މީހުން މަރުވެފައިވާ އިރު، އެތައް ހާސް ބަޔެއްގެ ގެދޮރު ގެއްލި، އެތައް މިލިއަން ބަޔަކަށް ވަނީ ފެންބޮޑުވުމުގެ އަސަރުކޮށްފަ އެވެ.
ޕާކިސްތާނުގެ ބައެއް ހިސާބުތަކުގައި ކުއްލި ނުރައްކާ އިއުލާންކޮށްފައިވާ އިރު، އެންމެ ބޮޑަށް އަސަރު ކުރަމުންދާ ސިންދް ޕްރޮވިންސަށް އެހެން އަހަރުތަކުގެ އޯގަސްޓް މަހާ އަޅާ ބަލާއިރު އަށް ގުނަ އިތުރަށް ވާރޭ ވެހިފައިވެ އެވެ.
ހުޅަނގު އުތުރު ހައިބަރް ޕަހްތުންހްވާ ޕްރޮވިންސްގައި ވެސް ކޯރުތައް ބަންޑުންވެ ފެންބޮޑުވެފައިވެ އެވެ. އޭގެ އިތުރުން ޕަންޖާބާއި ހުޅަނގު ދެކުނު ބަލުޗިސްތާން ޕްރޮވިންސްގައި ވެސް މީހުން ހާލުގަައި ޖެހިފައިވެ އެވެ.
ހުކުރު ދުވަހު ބޮޑު ވަޒީރު ޝެހްބާޒް ޝަރީފް ވިދާޅުވީ ފެންބޮޑުވުމުގެ އަސަރު 33 މިލިއަަން މީހުންނަށް ކޮށްފައިވާ ކަމަށެވެ. އެއީ އާބާދީގެ 15 ޕަސެންޓެވެ.
