ދުނިޔޭގެ ކަނޑުތަކާއި ކަނޑުގެ ދިރުންތައް ހިމާޔަތް ކުރަން އެއްބަސްވުމަކަށް ދިޔުމަށް ފަސް ވަނަ ފަހަރަށް ކުރި މަސައްކަތް ވެސް ފެއިލްވެއްޖެ އެވެ.
އދ. ގެ "ހައި ސީޒް" މުއާހަދާ ފާސްކުރުމާ ގުޅޭ މަޝްވަރާ ނިއު ޔޯކްގައި ކުރިއަށްދާތާ ދެ ހަފްތާ ވެއްޖެ އެވެ. އެކަމަކު ސަރުކާރުތަކުގެ ވެރިންނަށް މުއާހަދާގެ މާއްދާތަކާ މެދު އެއް ގަލަކަށް ނޭރުނެވެ.
titledesc
ދުނިޔޭގެ ތިން ބައި ކޮށްފައި ދެ ބަޔަކީ ބައިނަލްއަގްވާމީ ކަނޑުގެ ސަރަހައްދު ނަމަވެސް، އޭގެ ތެރެއިން ހިމާޔަތްކޮށްފައި ވަނީ އެންމެ 1.2 ޕަސެންޓެވެ.
ކަނޑުތައް ހިމާޔަތް ކުރުމާ ބެހޭ ބައިނަލްއަގްވާމީ އެއްބަސްވުމެއްގައި އެންމެ ފަހުން ސޮއިކުރީ މީގެ 40 އަހަރު ކުރިން 1982 ގަ އެވެ. އެއީ އދ. ގެ ކަނޑުތަކުގެ ގާނޫނާ ބެހޭ މުއާހަދާ އެވެ.
"ހައި ސީޒް" ނަމުގައި ބައިނަލްއަަގްވާމީ ކަނޑުގެ ސަރަހައްދުން ހުރިހާ ގައުމަކަށް ވެސް މަސް ބާނައި، ދަތުރުކޮށް، ދިރާސާ ކުރެވޭނެ ހިސާބުތައް ކަނޑައެޅީ އެ މުއާހަދާގެ ދަށުންނެވެ.
މިހާރު ހިމާޔަތްކޮށްފައިވާ ކަނޑުގެ 1.2 ޕަސެންޓް ސަރަހައްދުން ބޭރުގައި އުޅޭ ކަނޑުގެ ދިރުންތަކަށް އެކި ނުރައްކާ އެބަ އޮތެވެ.
އޭގެ ތެރޭގައި މާ ގިނައިން މަސް ބޭނުމުން ނެތި ދިޔުމުގެ ބިރާއި މޫސުމީ ބަދަލުގެ ނުރައްކަލާއި ކަނޑު ދަތުރު ކުރުމުގެ ޓްރެފިކްގެ ސަބަބުން އޮތް ނުރައްކާ ހިމެނެ އެވެ.
އެއްބަސްވުމަކަށް ނާދެވުމުން އެންމެ ބޮޑު ނުރައްކަލެއް އޮތް ކަނޑުގެ ދިރުންތަކުގެ ތެރޭގައި ހިމެނެނީ މިޔަރާއި މަޑި، ވެލާ އަދި ބޮޑު މަސް ފަދަ ތަކެއްޗެވެ.
