ދަރަންޏަށް ލުއިދިނުމާ މެދު ޗައިނާއިން ގެންގުޅޭ ވިސްނުން ބަދަލު ކުރުމަށް ސްރީލަންކާގެ ރައީސް ރަނިލް ވިކްރަމަސިންހަ ގޮވާލައްވައިފި އެވެ.
ނިކޭ އޭޝިއާއަށް ދެއްވި އިންޓަވިއުއެއްގައި ރަނިލް ވިދާޅުވީ ދަރަނި ރީސްޓްރަކްޗާ ކުރަން ލަންކާއަށް މަޖުބޫރުވެފައިވާ ވާހަކަ ޗައިނާއަށް ދަންނަވާފައިވާ ކަމަށެވެ.
"ޗައިނާއަށް ދައްކަން ޖެހޭ ދަރަނި ރީސްޓްރަކްޗާ ކުރަން ޖެހޭ ކަމަށް އަޅުގަނޑުމެން ޗައިނާ ސަރުކާރަށް ދަންނަވައިފިން،" ރަނިލް ވިދާޅުވި އެވެ.
އިގްތިސާދީ، އިޖްތިމާއީ އަދި ސިޔާސީ ކާރިސާއެއް ކުރިމަތިވެފައިވާ ލަންކާއަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ލިބޭނީ ދަރަނި ރީސްޓްރަކްޗާ ކުރުމުން ކަމަށް ޝަރުތުކޮށްފައިވެ އެވެ.
އެހެން ނަމަވެސް، ޗައިނާއަކީ ދަރަނި ރީސްޓްރަކްޗާ ކުރުމުގެ ސިޔާސަތު ގެންގުޅޭ ގައުމެއް ނޫނެވެ. އެހެންވެ، ދާދި ފަހުން ވެސް ސްރީލަންކާއަށް ވަނީ ޗައިނާގެ ބޭންކުތަކަށް ދަރަނި އަދާ ކުރަން ޗައިނާ ސަރުކާރުން އިތުރު ލޯނެއް ނަގަން އެދި ހުށަހަޅަން މަޖުބޫރުވެފަ އެވެ.
ދަރަންޏާ މެދު ޗައިނާގެ ވިސްނުން ބަދަލު ކުރަން ރަނިލް ގޮވާލެއްވި އިރު، ބުދަ ދުވަހު އެމަނިކުފާނު ވަނީ އައިއެމްއެފްގެ ވަފުދަކާ އެކު މަޝްވަރާ ކުރައްވައިފަ އެވެ.
