އިގްތިސާދީ ކާރިސާއެއް ކުރިމަތިވެފައިވާ ސްރީލަންކާއާ އެކު އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ މަޝްވަރާ ބުދަ ދުވަހު އަލުން ފަށައިފި އެވެ.
ލަންކާއަށް އެހީ ދިނުމާ ގުޅޭ މަޝްވަރާ ޖޫން މަހު ފެށުމަަށް ފަހު މެދުކަނޑާލީ އެ ގައުމުގައި ހަމަނުޖެހުން ބޮޑުވުމުންނެވެ. ހަމަނުޖެހުމުގެ ތެރެއިން ކުރީގެ ރައީސް ގޮތަބަޔާ ރާޖަޕަކްސަ ވަނީ އިސްތިއުފާ ދެއްވައިފަ އެވެ.
އޯގަސްޓް 24 އިން 31 އަށް އައިއެމްއެފްގެ ވަފުދެއް ލަންކާއަށް ކުރަައްވާ ދަތުރުގައި ބުދަ ދުވަހު ވަނީ އާ ރައީސް ރަނިލް ވިކްރަމަސިންހައާ ބައްދަލުކުރައްވައިފަ އެވެ.
ރަނިލް އާއި ލަަންކާގެ އެހެން ވެރިންނާ އެކު އައިއެމްއެފްގެ މަޝްވަރާ ފެށި އިރު، އަމާޒަކީ މާލީ ކާރިސާއިން އަރައިގަނެވޭނެ ގޮތެއް ހޯދުމެވެ.
މަޝްވަރާގެ އިތުރު ބުރެއް ހުކުރު ދުވަހު ކުރިއަށް ގެންދާ އިރު، މަރުކަޒީ ބޭންކާ އެކު ޓެކްނިކަލް ކަންކަމާ ގުޅޭ ވާހަކަތައް އެ ދުވަހު ބާއްވާނެ އެވެ.
ލަންކާގެ 51 ބިލިއަން ޑޮލަރުގެ ބޭރުގެ ދަަރަނި ޑީފޯލްޓްވެފައިވާ އިރު، ކާބޯތަކެއްޗާއި ތެލާާއި ބޭހުގެ ދަތިކަން އިންތިހާއަށް ކުރިމަތިވަމުން ދާތީ ލަންކާއިން އެދެނީ އައިއެމްއެފްގެ އެހީއަށެވެ.
އިންފްލޭޝަން ހިފެހެއްޓުމެއް ނެތި މައްޗަށް ޖެހެމުންދާކަން ފާހަގަކޮށް، މަރުކަޒީ ބޭންކުން ބުރާސްފަތި ދުވަހު ބުނީ މި އަހަރު އިގްތިސާދު ރެކޯޑް ނިސްބަތުން އަށް ޕަސެންޓުން ކުޑަވުމުގެ ނުރައްކާ އެބަ އޮތް ކަމަށާއި އިންފްލޭޝަން 65 ޕަސެންޓަށް އެރުން އެކަށީގެންވާ ކަމަށެވެ.
