ތައިލޭންޑްގެ ބޮޑު ވަޒީރު ޕްރަޔޫތް ޗާން އޮޗާ މަގާމުގެ ޒިންމާތަކުން ވަގުތީ ގޮތުން އެކަހެރި ކުރަން އެ ގައުމުގެ އެންމެ މަތީ ކޯޓުން ނިންމައިފި އެވެ.
ޕްރަޔޫތް ބޮޑު ވަޒީރު ކަމަށް ވަޑައިގެންނެވީ 2014 ވަނަ އަހަރު ބަގާވާތަކުންނެވެ. އޭގެ ފަހުން 2019 ވަނަ އަހަރުގެ އިންތިހާބު ކާމިޔާބު ކުރެއްވި އެވެ.
ތައިލޭންޑްގެ ގާނޫނު އަސާސީ ބުނާ ގޮތުން ބޮޑު ވަޒީރުކަމުގެ މަގާމުގައި އެކަކަށް ގިނަވެގެން ހުރެވޭނީ އަށް އަހަރެވެ. އެހެންވެ، އިދިކޮޅު ފަރާތްތަކުން ވަނީ މައްސަލަ ކޯޓަށް ވައްދާފަ އެވެ.
ވެރިކަން ކުރާ ކޯލިޝަނުގެ ތެރޭގައި ވެސް ޕްރަޔޫތްއާ ދެކޮޅު މީހުން ގިނަ އެވެ. މި އަހަރު ތަކުރާރުކޮށް އެމަނިކުފާނުގެ އިތުބާރު ނެތްކަމުގެ ވޯޓު ވެސް ނަގާފައިވެ އެވެ.
އިދިކޮޅު ފަރާތްތަކާއި އެކްޓިވިސްޓުން ބުނާާ ގޮތުގައި ޕްރަޔޫތްގެ ދައުރު ފެށުނީ ބަގާވާތުގެ ލީޑަރުގެ ގޮތުގައި ހުންނެވި އިރުގަ އެވެ. ބަގާވާތް ކުރީ މޭ 2014 ގަ އެވެ.
އާ އަސްކަރީ ސަރުކާރުގެ ބޮޑު ވަޒީރުގެ ގޮތުގައި އެމަނިކުފާނު އިއުލާން ކުރެއްވީ އޯގަސްޓް 2014 ގަ އެވެ. އެހެންކަމުން، މި ހަފްތާގައި އެމަނިކުފާނުގެ ދައުރު ނިމޭނެ ކަމަށް އިދިކޮޅުން ބުނެ އެވެ.
އެކަމަކު ޕްރަޔޫތްގެ ސަޕޯޓަރުން ބުނަނީ އެމަނިކުފާނުގެ ދައުރު ފެށީ އާ ގާނޫނު އަސާސީއާ އެކު 2017 ގައި ކަމަށެވެ. އަދި ބައެއް ފަރާތްތަަކުން ބުނީ ދަައުރު ފެށީ 2019 ގެ އިންތިހާބަށް ފަހުގައި ކަމަށެވެ.
ޕްރަޔޫތްގެ ސަޕޯޓަރުން ބުނާ ގޮތަަށް ކޯޓުން ނިންމައިފި ނަމަ، އާ އިންތިހާބެއް ކާމިޔާބުކޮށް 2027 ވަނަ އަހަރާ ހަމައަށް އެމަނިކުފާނު ވެރިކަމުގައި ހުންނެވުން އެކަށީގެންވެ އެވެ.
ކޯޓަށް ހުށަހެޅި މައްސަލައާ ގުޅިގެން މަގާމުގެ ޒިންމާތަކުން އެމަނިކުފާނު ވަގުތީ ގޮތުން އެކަހެރިކޮށްފައިވާ އިރު، އެ މުއްދަތުގައި ޒިންމާތައް އަދާކުރައްވާނީ ބޮޑު ވަޒީރުގެ ނައިބު ޕްރަވިތް ވޮންގްސުވަަން އެވެ.
