ބަންގްލަދޭޝަށް ދިމާވެފައިވާ ކަރަންޓުގެ ދަތިކަމާ ހެދި އޮފީސް ގަޑިތައް ކުޑަކޮށް، ކޮންމެ ހަފްތާއަކު ވެސް އިތުރު އެއް ދުވަސް ސްކޫލް ބަންދު ކުރަން ނިންމައިފި އެވެ.
މިދިޔަ ޖުލައި މަަހުން ފެށިގެން ބަންގްލަދޭޝުން އަންނަނީ ކޮންމެ ދުވަހަކު ވެސް ދެ ގަޑިއިރަށް ކަރަންޓު ކަނޑަމުންނެވެ.
ދާދި ފަހުން ޕެޓްރޯލްގެ އަގު 50 ޕަސެންޓު ބޮޑު ކުރުމުން، ގިނަ ބަޔަކު އަންނަނީ މަގުތަކަށް ނިކުމެ ސަރުކާރާ ދެކޮޅަށް މުޒާހަރާ ކުރަމުންނެވެ.
ތެލުގެ އިމްޕޯޓަށް ކުރާ ހޭދަ އިތުރުވީ ޔޫކްރެއިން ހަނގުރާމައާ ހެދި އެވެ. އޭގެ ސަބަބުން ބަންގްލަދޭޝްގެ އިގްތިސާދަށް އަސަރުކޮށް، ބޭރު ފައިސާގެ ރިޒާވް ވަނީ ހުސްވާން ކައިރިވެފަ އެވެ.
ހޯމަ ދުވަހު ކެބިނެޓް ސެކެޓްރީ ހާންދްކެރް އަންވަރުލް އިސްލާމް ވިދާޅުވީ ކޮންމެ ހަފްތާއަކު ވެސް އިތުރު އެއް ދުވަސް ސްކޫލް ބަންދު ވާނެ ކަމަށެވެ.
ކުރިން ސްކޫލް ބަންދު ވަނީ ހުކުރު ދުވަހު އެކަންޏެވެ. ހޯމަ ދުވަހުގެ ނިންމުމާ އެކު ހޮނިހިރު ދުވަަހު ވެސް ދެން ސްކޫލްތައް ބަންދު ވާނެ އެވެ.
އޭގެ އިތުރުން ސަަރުކާރުގެ އޮފީސްތަކާއި ބޭންކުތަކުގެ މަސައްކަތު ގަޑި ކޮންމެ ދުވަހަކު އަށް ގަޑިއިރުން ހަތް ގަޑިއިރަށް ކުޑަކުރިކަން ވެސް އިއުލާންކުރި އެވެ. އެކަމަކު ޕްރައިވެޓް އޮފީސްތައް ބޭނުން ގޮތަކަަށް ގަޑިތައް ރޭވޭނެ އެވެ.
މިދިޔަ ޖުލައި މަހު ބަންގްލަދޭޝުން ވަނީ އިންޓަނޭޝަނަލް މަަނިޓަަރީ ފަންޑް (އައިއެމްއެފް) ގެ ލޯނަކަށް އެދިފަ އެވެ. ދެކުނު އޭޝިއާއިން ދެން އައިއެމްއެފްގެ ލޯނަށް އެދިފަައި ވަނީ ސްރީލަންކާ އާއި ޕާކިސްތާނެވެ.
