މިލާން (އޮގަސްޓް 23) - އިޓާލިއަން ލީގުގައި އެ ގައުމުގެ ޒުވާން ކުޅުންތެރިންނަށް ފުރުސަތު ލިބޭ މިންވަރު ކުޑަވުމަކީ ކަންބޮޑުވާންޖެހޭ ކަމެއް ކަމަށް އިޓަލީ ފުޓްބޯޅަ ފެޑެރޭޝަނުގެ ރައީސް ގަބްރިއެލޭ ގްރަވީނާ ވިދާޅުވެއްޖެ އެވެ.
އިޓާލިއަން ލީގުގެ އާ ސީޒަން ފަށައިގެން ކުރިއަށްދާއިރު، މިހާތަނަށް ފެނުނު މެޗުތަކާ މެދު ގްރަވީނާ ދެކޭ ގޮތެއް ހިއްސާކުރެއްވުމަށް މިޑިއާ އިން ވަނީ ސުވާލުކޮށްފަ އެވެ. ގްރަވީނާ ވިދާޅުވީ ފުރުސަތުތައް ހުރި ގޮތުން ކަންބޮޑުވާން ޖެހޭ ކަންކަން ފާހަގަކުރެވިފައިވާ ކަމަށެވެ.
"ފުރަތަމަ މެޗުތަކުން މި ފެންނަނީ އެންމެ ޕޮޒިޓިވް މަންޒަރުތަކެއް ނޫން. ޓީމުތަކުން މެޗުތަކުގައި ކުޅެން ފުރުސަތު ލިބުނު 67 ޕަސެންޓް ކުޅުންތެރިންނަކީ ބިދޭސީން، މިއީ ޔަގީނުން ވެސް އިޓަލީގެ ފުޓްބޯޅަ އަށް ރަނގަޅު މަންޒަރެއް ނޫން،" ގްރަވީނާ ވިދާޅުވި އެވެ.
"މީގެ އެންމެ ބޮޑަށް ކަންބޮޑުވާން ޖެހޭ މައްސަލަ އަކީ އިޓަލީ ފުޓްބޯޅަ އަށް ޒުވާން ކުޅުންތެރިން ނެރެދޭން މަސައްކަތް ކުރި ކްލަބްތައް މިހާރު އެކަން މަޑުޖައްސާލާފައި، ޒުވާން ބިދޭސީ ކުޅުންތެރިންނަށް ފުރުސަތު ދޭން ފެށި މަންޒަރު ފެނުން. އަހަރެމެން އެބަޖެހޭ، އަހަރެމެންގެ ޒުވާން ކުުޅުންތެރިން ކުރިއެރުވޭނެ ޕްލެޓްފޯމްތައް އަބަދުވެސް ދަމަހައްޓަން،"
އިޓަލީގެ ފުޓްބޯޅަ ފެޑެރޭޝަނުން އަބަދުވެސް އެ ގައުމުގެ އެކި އުމުރުފުރާތަކުގެ އެލީޓް ކުޅުންތެރިންގެ ޕޫލްތަކެއް ގެންގުޅެ އެވެ. އެ ކުޅުންތެރިންގެ ކުޅުން ދިރާސާކޮށް، އަނެއް ލެވަލަށް ގެންދަން ކުރަން ޖެހޭ މަސައްކަތްތަކުގައި ބައިވެރިވެ އެވެ.
ގްރަވީނާ ވިދާޅުވީ މި ވަގުތު އުމުރުފުރާގެ އެންމެ ސީނިއާ އެލީޓް ޕޫލްގައި ތިބި 25 ކުޅުންތެރިންނަށް ސީނިއާ ފުޓްބޯޅައިގައި ލިބޭ ފުރުސަތުތައް މަދުކަމަށެވެ. އެކަމަށް ހައްލުތަކެއް ހޯދަން، އިޓަލީ ފުޓްބޯޅަ ފެޑެރޭޝަންގެ ޓެކްނިކަލް ޑިޕާޓްމަންޓުން ކްލަބްތަކާ މަޝްވަރާ ކުރާނެ ކަމަށް ގްރަވީނާ ވަނީ ވިދާޅުވެފަ އެވެ.
